काठमाडौँ । बिरामीको अहोरात्र सेवामा खटिने नर्सहरूमाथि भइरहेको श्रमशोषणका विरुद्ध काठमाडौँको वीर अस्पताल परिसरमा उर्लिएको आन्दोलनको ज्वालामा अब देशकै चर्चित एवं हक्की व्यक्तित्व, स्वतन्त्र नागरिक अभियानका अध्यक्ष ऋषि धमलाले पूर्ण ऐक्यबद्धता जनाएका छन्। नर्सिङ पेसाको सम्मान, अधिकार र सेवासुविधाका लागि आमरण अनशनमा बसेकी नर्स ज्योति रानाभाटको अनशनको छैटौँ दिन वीर अस्पताल पुगेर धमलाले नर्सहरूको आन्दोलनप्रति आक्रामक र पूर्ण ऐक्यबद्धता जनाएका हुन्।
आफ्नो ओजस्वी र खरो शैलीमा प्रस्तुत हुँदै धमलाले नर्सहरूका १५ बुँदे माग पूर्णरूपमा जायज रहेको र यी मागहरू पूरा नगरेसम्म आन्दोलनको मैदानबाट एक कदम पनि पछि नहट्न आह्वान गरे।
“नर्सहरूले हस्पिटलमा जति मिहिनेत र पसिना बगाएका छन्, त्यति काम अरू कसैले गरेको छैन। तर आज उनीहरूमाथि नै घोर शोषण भइरहेको छ ! ज्योति रानाभाटजीको अनशनको छैटौँ दिन भइसक्दा पनि राज्य कानमा तेल हालेर बस्न पाउँदैन। उहाँहरूका माग समयसापेक्ष छन्, राज्यले तुरुन्त तलब, भत्ता र अधिकार सुनिश्चित गर्नैपर्छ !” — ऋषि धमला
नर्सहरूको हकहितका लागि जस्तोसुकै चुनौती मोल्न तयार रहेको उद्घोष गर्दै अध्यक्ष धमलाले अब यो मुद्दालाई निर्णायक मोडमा पुर्याउने दाबी गरे। उनले स्वास्थ्यमन्त्री, स्वास्थ्य सचिव र प्रधानमन्त्री बालेन शाहलाई समेत एउटै टेबुलमा राखेर नर्सहरूका समस्या तत्काल समाधान गराउन आफू निरन्तर प्रतिबद्ध भएर लाग्ने स्पष्ट पारे।
दबाबमूलक शैलीमा सरकारलाई सचेत गराउँदै अध्यक्ष धमलाले थपे, “नर्सहरूको भूमिकालाई यो सरकारले नजरअन्दाज गर्नै सक्दैन। संवादको ढोका खोलेर तत्काल माग पूरा गर्नुको अर्को कुनै विकल्प छैन। यदि राज्यले नर्सहरूलाई उचित सम्मान, राम्रो सेवासुविधा र अधिकार दिन्छ भने उहाँहरूले अझ उत्कृष्ट सेवा दिएर मुलुकको स्वास्थ्य क्षेत्र नै कायापलट गरिदिनुहुन्छ।”
अध्यक्ष धमलाले अनशनरत ज्योति रानाभाटसहित सम्पूर्ण आन्दोलनकारी नर्सहरूलाई ढाडस दिँदै भने, “तपाईंहरू आफ्ना माग पूरा गराउन कम्मर कसेर लाग्नुहोस् ! देशभरिका आम नागरिकको सद्भाव र समर्थन तपाईंहरूको साथमा छ। जबसम्म १५ बुँदे माग सम्बोधन हुँदैन, तबसम्म यो आन्दोलनबाट कुनै पनि हालतमा फिर्ता नहुनुहोस्। स्वतन्त्र नागरिक अभियान तपाईंहरूको साथमा चट्टानझैँ उभिनेछ।”
सोही क्रममा धमलाले सम्पूर्ण पत्रकार तथा सञ्चारकर्मीहरूलाई पनि नर्सहरूको यो पवित्र र न्यायपूर्ण आन्दोलनलाई विशेष प्राथमिकताका साथ समाचार सम्प्रेषण गरी राज्यलाई दबाब दिन जोडदार आग्रह गरे।
नर्सहरूको पेसागत मर्यादा र अधिकारका लागि वीर अस्पतालको प्राङ्गणबाट ऋषि धमलाले छेडेको यो शंखनादले अहिले देशैभरिका नर्सहरूमा नयाँ ऊर्जा र उत्साह थपेको छ भने सरकारलाई गम्भीर भएर सोच्न बाध्य बनाएको छ ।
प्रतिक्रिया