भोटेकोसी बाढी प्रभावित ५ जिल्लाका १५ पालिकालाई १३ करोड ५० लाख निकासा

काठमाडौँ । रसुवाको भोटेकोसी नदीमा आएको विनाशकारी बाढीबाट प्रभावित पाँच जिल्लाका १५ स्थानीय तहका लागि सरकारले १३ करोड ५० लाख रुपैयाँ निकासा गरेको छ। प्रधानमन्त्री तथा मन्त्रिपरिषद् कार्यालय र राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत दुई चरणमा गरी उक्त रकम सम्बन्धित पालिकामा पठाइएको हो।

भोटेकोसी हुँदै त्रिशूली नदीमा बाढी आएलगत्तै सरकारले प्रारम्भिक उद्धार तथा राहतका लागि रसुवा र नुवाकोटलाई एक–एक करोड तथा धादिङलाई ५० लाख रुपैयाँ दिने निर्णय गरेको थियो। तत्पश्चात् प्राधिकरणमार्फत भदौ १२ गते ६ करोड ५० लाख र भदौ १६ गते थप ६ करोड ५० लाख रुपैयाँ निकासा गरिएको छ।

पालिकागत बजेट विवरण:

• रसुवा: गोसाइँकुण्ड गाउँपालिका (२ करोड), उत्तरगया गाउँपालिका (१ करोड ५० लाख), कालिका गाउँपालिका (६० लाख) र आमा छोदिङ्मो गाउँपालिका (४० लाख)।
• नुवाकोट: विदुर नगरपालिका (३ करोड), बेलकोटगढी नगरपालिका (१ करोड ५० लाख), तारकेश्वर गाउँपालिका (१ करोड) र किस्पाङ गाउँपालिका (५० लाख)।
• धादिङ: गल्छी गाउँपालिका (६० लाख), सिद्धलेक गाउँपालिका (४० लाख), गजुरी गाउँपालिका (४० लाख) र बेनिघाट रोराङ गाउँपालिका (४० लाख)।
• गोरखा: गण्डकी गाउँपालिका (४० लाख)।
• तनहुँ: देवघाट गाउँपालिका (४० लाख) र आँबुखैरनी गाउँपालिका (४० लाख)।

राहत कोषमा ६ अर्बभन्दा बढी मौज्दात

यसैबीच, प्रधानमन्त्री दैवी प्रकोप उद्धार कोष र प्रधानमन्त्री राहत कोषमा हालसम्म कुल ७ अर्ब ८८ लाख ५७ हजार २१७ रुपैयाँ जम्मा भएको छ। भदौ १६ गते विपद् व्यवस्थापन प्राधिकरणलाई रकम निकासा गरिएपछि हाल उक्त कोषमा ६ अर्ब ८८ लाख ५७ हजार २१७ रुपैयाँ मौज्दात रहेको छ। साथै, प्रधानमन्त्री राहत कोषमा थप ६१ लाख ४१ हजार ७०२ अमेरिकी डलरसमेत जम्मा भइसकेको प्रधानमन्त्री तथा मन्त्रिपरिषद् कार्यालयले जनाएको छ।