काठमाडौ । रसुवाको भोटेकोशीमा आएको विनाशकारी बाढीपछि खोज तथा उद्धार अभियान जारी रहँदा हालसम्म १ हजार २५२ जनाको शव फेला परेको छ।
ठूलो संख्यामा नागरिक अझै सम्पर्कविहीन छन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणले बिहीबार मध्याह्न सार्वजनिक गरेको विवरणअनुसार बाढी प्रभावित आठ जिल्लामा गरी उक्त संख्यामा शव फेला परेको हो।
प्राधिकरणको तथ्यांकअनुसार चितवनमा सबैभन्दा धेरै ३५५ शव फेला परेका छन्। त्यसपछि नवलपरासी पूर्वमा २१८, नवलपरासी पश्चिममा २०८, नुवाकोटमा १७७, रसुवामा १२७, गोरखामा ६९, धादिङमा ६० र तनहुँमा ३८ शव भेटिएका छन्।
बाढीको विपत्तिपछि अझै ४ हजार २१६ जना नागरिक सम्पर्कविहीन रहेको प्राधिकरणले जनाएको छ। बेपत्ता नागरिकको खोजीका लागि सुरक्षा निकाय तथा अन्य उद्धार टोली परिचालन भइरहेका छन्। यस्तै, विपद्मा परेका ११ हजार ९९३ जनाको उद्धार भइसकेको छ। बाढीका कारण ५ हजार १३५ जना घाइते भएको प्राधिकरणको पछिल्लो विवरणमा उल्लेख छ।
ठूलो भूभागमा फैलिएको बाढी, क्षतिग्रस्त सडक तथा सञ्चार र यातायातमा आएको अवरोधका कारण खोज तथा उद्धार कार्य चुनौतीपूर्ण बनेको छ। फेला परेका शवको पहिचान गरी परिवारलाई बुझाउने तथा सम्पर्कविहीनको खोजीलाई प्राथमिकतामा राखिएको छ।
विपद्को वास्तविक क्षतिको थप विवरण संकलन तथा खोजी कार्य जारी रहेकाले मृतक र बेपत्ताको संख्या अझै बढ्न सक्ने देखिएको छ।
प्रतिक्रिया