ह्यारी केनलाई ब्यालन डी’ओर

लन्डन, १० कात्तिक । इङ्ल्यान्डका कप्तान ह्यारी केनले स्पेनका लामिन यमल र फ्रान्सका किलियन एमबाप्पेलाई पछि पार्दै सन् २०२६ को पुरुष ब्यालन डी’ओर जितेका छन् । उनी सन् २००१ मा माइकल ओवेनपछि यो पुरस्कार जित्ने पहिलो इङ्लिस खेलाडी बनेका छन् ।

३३ वर्षीय बायर्न म्युनिखका फरवार्ड केनले गत सिजन क्लब र देशका लागि खेलेका ६५ खेलमा ७३ गोल गरेका थिए । उनको योगदानमा बायर्नले लिग र कप दुवै उपाधि जितेको थियो । विश्वकपमा तेस्रो भएको इङ्ल्यान्डका लागि उनले ६ गोल गरेका थिए । सन् २०२३ मा बायर्नमा आबद्ध भएपछि उनको उत्कृष्ट गोल प्रदर्शनले व्यक्तिगत सफलताको बाटो खोलेको हो ।

महिलातर्फ स्पेनकी एलेक्सिया पुटेलासले तेस्रोपटक ब्यालन डी’ओर जितिन । उनले गत सिजन बार्सिलोनालाई च्याम्पियन्स लिग जिताउन महत्त्वपूर्ण भूमिका खेलेकी थिइन । घुँडाको गम्भीर चोटपछि उनी पुनः शीर्ष स्थानमा फर्किएकी हुन् । यसअघि लगातार तीन वर्ष विजेता बनेकी एटाना बोनमाटी खुट्टा भाँचिएका कारण यसपटक उपाधि दौडबाट बाहिरेकी थिइन ।

बार्सिलोनाका १९ वर्षीय यमलले लगातार तेस्रोपटक वर्षको उत्कृष्ट युवा खेलाडीको पुरस्कार जिते । पुरुष ब्यालन डी’ओरमा उनी तेस्रो भए भने एमबाप्पे दोस्रो स्थानमा रहे । विश्वकप, च्याम्पियन्स लिग र ला लिगामा सर्वाधिक गोलकर्ता बने पनि एमबाप्पेले यसपटक प्रमुख टोलीगत उपाधि जित्न सकेनन् ।

स्पेनलाई विश्वकप उपाधि दिलाएका लुइस डे ला फुएन्टे उत्कृष्ट पुरुष प्रशिक्षक घोषित भए । बार्सिलोनाका पेरे रोम्युले महिला प्रशिक्षकको पुरस्कार जिते । लगातार दोस्रोपटक च्याम्पियन्स लिग जितेको पेरिस सेन्ट जर्मेन वर्षको उत्कृष्ट पुरुष क्लब बन्यो । स्पेनका उनाई सिमोन र काटा कोल उत्कृष्ट पुरुष तथा महिला गोलकिपर घोषित भए । रासस