काठमाडौं, १६ वैशाख । नेकपा (माओवादी केन्द्र) को जागरण अभियान टोलीले धनगढी उपमहानगरपालिका–१८ फुलबारी डिपो बजारमा शहीद परिवारहरूसँग भेटघाट तथा अन्तरक्रिया गरेको छ। सो अवसरमा शहीद परिवारको तर्फबाट ज्ञापनपत्र पनि बुझाइएको छ । माओावदी केन्द्रका अध्यक्ष पुष्पकमल दाहाल ‘प्रचण्ड’ ले शहीद परिवारका माग र पीडालाई पार्टीले गम्भीरतापूर्वक लिएको बताए । ‘समस्या जहाँ समाधान गर्न सकिन्छ, त्यहीँ गर्नेछौं, नसके केन्द्रमा पुर्याएर अगाडि बढाउनेछौं।’
प्रचण्डको अनुसार अहिले पार्टीको केन्द्रीय समितिको निर्णयअनुसार देशभर शहीद तथा बेपत्ता परिवारहरूसँग संवाद भइरहेको छ। ‘प्रधानमन्त्री हुँदा जनयुद्धलाई राष्ट्रिय दिवसको रूपमा घोषणा गरिएको थियो, जुन शहीद, बेपत्ता र योगदान दिने सबैको सम्मानको विषय हो,’– उनले भने ।
अदालतको आदेशका कारण त्यो प्रक्रिया रोकिए पनि पार्टी अझै त्यसलाई राष्ट्रिय दिवसका रूपमा मनाउने पक्षमा रहेको बताए । ‘शहीदहरू राष्ट्रिय शहीद घोषित हुनु सन्तोषको कुरा हो,’–अध्यक्ष प्रचण्डले भने ।
अध्यक्ष प्रचण्डले सत्य निरूपण तथा मेलमिलाप सम्बन्धी विधेयक अन्तिम चरणमा पुगेको, सिफारिस समिति बनेको र त्यसको आधारमा आयोग बन्ने प्रक्रियाले गति लिएको जानकारी दिए । आयोग बनेपछि राज्यले शहीद तथा बेपत्ताका नाममा प्रमाणिक मान्यता दिने, स्मृति पार्क निर्माण गर्ने, प्रमाणपत्र वितरण गर्ने व्यवस्था गरिने पनि उनले बताए । साथै, कम्तीमा एक जना परिवार सदस्यलाई रोजगारी दिने, सार्वजनिक यातायातमा छुट दिने र परिपूरण सुनिश्चित गर्ने कानुनी व्यवस्था विधेयकमै रहेको पनि अध्यक्ष प्रचण्डले बताए ।
जनयुद्धमा समर्पित परिवारको योगदानको स्मरण गर्दै प्रचण्डले भने, ‘हामी तपाईंहरूका पीडा बिर्सेका छैनौं, बिर्सने पनि छैनौं ।’
प्रतिक्रिया