सुदूरपश्चिममा भारी वर्षाः उच्च सतर्कता अपनाउन सुरक्षा निकायहरूलाई मुख्यमन्त्रीको निर्देशन

काठमाडौं, १६ असार । सुदुरपश्चिमका मुख्यमन्त्री कमलबहादुर शाहले बाढीजन्य विपदको उदार कार्यका लागि परिचालित हुन तयारी अवस्थामा रहन सुरक्षा निकायलाई निर्देशन दिएका छन् । लगातारको भारी वर्षाले सुदूरपश्चिमको विभिन्न क्षेत्रहरु डुवानमा परेका छन् ।

भारी वर्षाका कारण कैलाली, कञ्चनपुर लगायत आसपासका क्षेत्रहरू डुवानमा परेका छन् । मुख्यगरी धनगढीको विशालनगर, मिलनचोक, शिवनगर, हसनपुर, क्याम्पस रोड, मालिका टोल, कृष्णनगर, पुरानो भन्सार कटान गाउँको दक्षिणपट्टिको बस्तीलगायत आसपासका स्थानहरू जलमग्न भएका छन् ।

त्यहाँका अधिकांश पसल पनि डुबानमा परेका छन् । भारी वर्षाले सडक तथा नाली पूरै भरिएर सडकमा हिँड्न सर्वसाधारणलाई समस्या भएको छ । अव्यवस्थित तथा पुराना नालीका कारण अलि पनि बढी पानी परेपछि निकासा हुन नसक्दा हरेक वर्ष वर्षातमा यस्तो अवस्था सृजना हुने गरेको छ ।

पानी निकासा हुने पुराना खोलानालाहरू अतिक्रमण भएका कारण पनि वर्षैपिच्छे यहाँका बस्तीहरू डुबानमा पर्ने गरेको स्थानीयवासीको भनाइ छ । ढलको व्यवस्थापन नभई सडक पिच हुने गरेका कारण पनि बस्ती डुबानमा पर्ने गरेको स्थानीय अगुवा शिवराज जोशीले बताए । File Photo/RN