एयर फोर्स वन, १७ कात्तिक । अमेरिकी राष्ट्रपति डोनाल्ड ट्रम्पले बेलायतका राजा चाल्र्स तृतीयका भाइ पूर्व राजकुमार एन्ड्र्यु र दिवङ्गत यौन अपराधी जेफ्री एपस्टिनबीचको अपमानजनक सम्बन्ध प्रकरणप्रति दुःख प्रकट गरेका छन् । उनले उक्त घटनाका कारण बेलायती शाही परिवारप्रति ‘नराम्रो महसुस’ भएको बताए ।
एयर फोर्स वनमा रहेका बेला एएफपीका पत्रकारले हालैको शाही विवादबारे प्रश्न गर्दा ट्रम्पले भने, “म निकै नराम्रो महसुस गर्छु । यो परिवारका लागि निकै डरलाग्दो र दुःखद अवस्था हो । वास्तवमै म उहाँहरूप्रति सहानुभूति महसुस गर्छु ।”
७९ वर्षीय ट्रम्प आफैँ पनि न्युयोर्कका धनी वित्तीय कारोबारी एपस्टिनसँगको आफ्नै सम्भावित सम्बन्धका कारण पछिल्ला महिनाहरूमा राजनीतिक दबाबमा रहँदै आएका छन्। एपस्टिनको सन् २०१९ मा जेलमा रहँदै मृत्यु भएको थियो ।
ट्रम्पको टिप्पणी त्यस्तो समयमा आएको छ जतिबेला बेलायती सरकारले पूर्व राजकुमार एन्ड्र्युको बाँकी रहेको मानार्थ ‘भाइस–एडमिरल’ पद समेत खोस्ने तयारी गरिरहेको छ । उनलाई अब औपचारिक रूपमा एन्ड्र्यु माउन्टब्याटन–विन्डसर भनेर चिनिन्छ ।
अमेरिकी राष्ट्रपति ट्रम्पले विगतमा बेलायती शाही परिवारप्रति बारम्बार प्रशंसा प्रकट गरेका छन् । केही महिना अघि सेप्टेम्बर महिनामा राजा चार्ल्सले उनलाई भव्य राजकीय भ्रमणका क्रममा विन्डसर क्यासलमा राजकीय भोज, सैन्य परेड र फ्लाइओभरसहितको स्वागत गरेका थिए ।
तर यता ‘एपस्टिन फाइल’ का नामले चिनिएका कागजातहरू पुनः सार्वजनिक भएपछि एपस्टिनसँग लामो समयको सम्बन्ध रहेका ट्रम्पको दोस्रो कार्यकाल पनि विवादको केन्द्रमा तानिएको छ ।
जुलाईमा ट्रम्प प्रशासनले नयाँ प्रमाण नपाइएकाले एपस्टिनसम्बन्धी थप कागजात सार्वजनिक गर्ने वा नयाँ अनुसन्धान सुरू गर्ने कुनै आवश्यकता नभएको घोषणा गरेको थियो । एपस्टिनले आफूले यौन मसाजका नाममा भर्ती गराएका कम उमेरका किशोरीहरूलाई यौन तस्करीमा प्रयोग गरेको अभियोगमा जेल सजायको पर्खाइमै आत्महत्या गरेका थिए ।
अधिकारिहरूले उक्त मृत्यु आत्महत्या भएको पुष्टि गरे पनि यस घटनापछि ट्रम्पका समर्थकहरूबीच अनेकौँ षड्यन्त्र सिद्धान्त फैलिएका छन् — जसअनुसार एपस्टिनलाई उच्च–प्रोफाइल व्यक्तिहरूको रहस्य उजागर हुन नदिन हत्या गरिएको थियो ।
ट्रम्पले भने एपस्टिनसँग कुनै प्रत्यक्ष संलग्नता नरहेको बारम्बार दोहोर्याउँदै यो विषयलाई आफ्ना राजनीतिक प्रतिद्वन्द्वीहरूले सिर्जना गरेको ‘पूर्ण कपट’ भनेर खारेज गरेका छन् ।
पूर्व राजकुमार एन्ड्र्यु र एपस्टिनबीचको सम्बन्धले बेलायतमा ठूलो सार्वजनिक आक्रोश सिर्जना गरेको छ । यसै कारण राजा चार्ल्स तृतीयले विगत बिहीबार आफ्ना कान्छा भाइ एन्ड्र्युका सबै बाँकी शाही उपाधि र सम्मानहरू खोसेको र उनलाई विन्डसर एस्टेटस्थित स्थायी निवासबाट निष्कासन गरेका थिए ।
बेलायती रक्षामन्त्री जोन हिलीले आइतबार बिबिसीसँगको अन्तर्वार्तामा भने, “राजाको निर्देशनअनुसार हामी अहिले उहाँको बाँकी रहेको भाइस–एडमिरलको उपाधि पनि हटाउने तयारीमा छौँ ।”
एन्ड्र्युले सन् १९८२ को फकल्यान्ड युद्धमा रोयल नेभीमा हेलिकप्टर पाइलटका रूपमा सेवा गरेका थिए र त्यसका लागि सम्मानित भएका थिए । उनले २२ वर्षको सैन्य सेवापछि सन् २००१ मा सेवानिवृत्ति लिएका थिए ।
सन् २०२२ मा एपस्टिनकी मुख्य अभियोगकर्ता भर्जिनिया गिफ्रेद्वारा दायर मुद्दापछि, तत्कालीन रानी स्वर्गीय एलिजाबेथ द्वितीयले पनि एन्ड्र्युका अन्य मानार्थ सैन्य उपाधि खोस्नुभएको थियो । गिफ्रेको दाबीअनुसार उनलाई किशोरावस्थामै तस्करी गरी एन्ड्र्युसँग तीन पटक यौन सम्बन्ध राख्न बाध्य पारिएको थियो, जसमा दुई पटक उनी केवल १७ वर्षकी थिइन् ।
एन्ड्र्युले भने ती सबै आरोपहरू अस्वीकार गर्दै आफू निर्दोष रहेको दाबी गर्दै आएका छन् । यस प्रकरणले अहिले पुनः शाही परिवारमाथि नै गम्भीर चुनौती र जनआक्रोश उत्पन्न गरेको छ । रासस
प्रतिक्रिया