कोपनहेगन, ८ माघ । अमेरिकी राष्ट्रपति डोनाल्ड ट्रम्पले ग्रिनल्यान्डसम्बन्धी अडान परिवर्तन गरेपछि पनि डेनमार्कले आफ्नो सार्वभौमसत्तामा कुनै पनि प्रकारको वार्ता गर्न नसकिने स्पष्ट पारेको छ । डेनमार्ककी प्रधानमन्त्री मेट्टे फ्रेडरिक्सनले बिहीबार वक्तव्य जारी गर्दै ग्रिनल्यान्ड डेनमार्क राज्यको अभिन्न हिस्सा भएकाले यस विषयमा सम्झौता सम्भव नभएको दोहोर्याएका हुन् ।
राष्ट्रपति ट्रम्पले आफू नाटो महासचिव मार्क रुटसँग आर्कटिक सुरक्षाका लागि ‘भविष्यको सम्झौताको ढाँचा’ मा सहमत भएको बताएको सन्दर्भमा प्रधानमन्त्री फ्रेडरिक्सनले ‘त्यस्तो कुनै सहमति भएको छैन भन्ने जानकारी आफूलाई दिइएको’ स्पष्ट पारे । उनले डेनमार्क र ग्रिनल्यान्डसँग सम्बन्धित विषयमा निर्णय लिने अधिकार केवल डेनमार्क र ग्रिनल्यान्डकै रहेको बताए ।
यसअघि बुधबार राष्ट्रपति ट्रम्पले नाटोको सहयोगी राष्ट्र डेनमार्कको अर्ध–स्वायत्त क्षेत्र ग्रिनल्यान्डमाथि अमेरिकी नियन्त्रणको दबाबस्वरूप आठ युरोपेली देशमाथि लगाउने भनिएका शुल्कहरू अचानक खारेज गरेका थिए । केही समयअघि उनले ‘अधिकार, उपाधि र स्वामित्वसहित’ ग्रिनल्यान्ड प्राप्त गर्न चाहेको अभिव्यक्ति दिएपछि युरोपमा चासो र चिन्ता बढेको थियो, जसलाई पछिल्लो निर्णयले केही हदसम्म कम गरेको छ ।
ट्रम्पले ग्रिनल्यान्डमा ‘गोल्डन डोम’ मिसाइल रक्षा प्रणालीबारे थप छलफल भइरहेको पनि बताएका छन् । करिब ७५ अर्ब डलर लागतको यो बहुस्तरीय रक्षा प्रणालीले पहिलो पटक अन्तरिक्षमा अमेरिकी हतियार तैनाथ गर्ने योजना समेट्ने जनाइएको छ । तर यसबारे अझै काम भइरहेको भन्दै उनले विस्तृत विवरण सार्वजनिक गरेको छैन ।
प्रधानमन्त्री फ्रेडरिक्सनले आफ्नो वक्तव्यमा आर्कटिक क्षेत्रको सुरक्षा सम्पूर्ण नाटोको साझा विषय भएको उल्लेख गर्दै अमेरिकी राष्ट्रपति र नाटो महासचिवबीच यस विषयमा छलफल हुनु स्वाभाविक भएको बताए । उनले डाभोसमा ट्रम्पसँग भेट हुनु अघि र पछि पनि महासचिव रुटसँग निरन्तर संवाद भइरहेको जानकारी दिए । तर उनले स्पष्ट रूपमा लेखे, “सुरक्षा, लगानी र आर्थिक विषयमा छलफल हुन सक्छ, तर हाम्रो सार्वभौमसत्तामा वार्ता हुन सक्दैन ।”
उनले डेनमार्क आर्कटिक सुरक्षालाई सुदृढ बनाउन सहयोगी राष्ट्रहरूसँग रचनात्मक संवादमा संलग्न हुन तयार रहेको पनि बताए, जसमा अमेरिकी ‘गोल्डन डोम’ कार्यक्रमसमेत पर्न सक्छ, तर यो सबै डेनमार्कको क्षेत्रीय अखण्डताको सम्मानसहित हुनुपर्ने उनको जोड थियो ।
फक्स न्युजसँगको अन्तर्वार्तामा ट्रम्पले उल्लेख गरेको फ्रेमवर्क सम्झौताअन्तर्गत ग्रिनल्यान्ड डेनमार्क राज्यकै हिस्सा रहने हो कि होइन भन्ने प्रश्नमा नाटो महासचिव रुटले राष्ट्रपति ट्रम्पसँगको पछिल्लो संवादमा त्यो विषय उठेको नभएको बताए । उनका अनुसार छलफलको केन्द्र आर्कटिक क्षेत्रमा बढ्दो चिनियाँ र रुसी गतिविधिका बीच त्यस क्षेत्रलाई कसरी सुरक्षित बनाउने भन्ने विषयमै केन्द्रित थियो । रासस
प्रतिक्रिया