काठमाडौं, ९ फागुन । नेपाली कम्युनिष्ट पार्टीनिकट भातृ संगठन वाईसिएलले पार्टीको झण्डा जलाउने, च्यात्ने, कार्यक्रम विथोल्नेजस्ता अराजनीतिक र उच्छृंखल गतिविधि गरेको भन्दै आपत्ति जनाएको छ ।
वाईसिएलका अध्यक्ष पुष्प ओलीले आज एक विज्ञप्ति जारी गर्दै यस्ता गतिविधिहरुलाई राज्य संयन्त्र, निर्वाचन आयोग, प्रहरी प्रशासनले प्रभावकारी रुपमा नियन्त्रण र कारबाही गरिनुपर्ने माग गरेका छन् । यदि समयमै नियन्त्रण नभए जनस्तरबाट उत्पन्न हुने प्रतिरोध वा प्रतिकारको नैतिक जिम्मेवारी राज्य र यस्ता गतिविधिमा संलग्न पक्षले नै वहन गर्नुपर्ने वाईसिएलको मत छ ।
यस्तो छ विज्ञप्ति
राजनीतिलाई गलत दिशातिर लैजान खोज्ने देशी–विदेशी प्रतिक्रियावादी तत्वहरूले झण्डा जलाउने, च्यात्ने, कार्यक्रम बिथोल्ने जस्ता अराजनीतिक र उच्छृंखल गतिविधि गर्नु लोकतान्त्रिक संस्कारविपरीत कार्य हो। यस्ता हर्कतहरूको हामी घोर विरोध तथा भत्र्सना गर्दछौं।
हामीले लामो संघर्ष र बलिदानबाट स्थापित गरेको गणतन्त्रको मूल सुन्दरता भनेको अभिव्यक्ति स्वतन्त्रता, आफ्ना राजनीतिक गतिविधि निर्वाध रूपमा सञ्चालन गर्ने अधिकार र फरक विचारप्रति पारस्परिक सम्मान हो। लोकतन्त्रमा असहमति स्वाभाविक हुन्छ, तर असहिष्णुता र हिंसात्मक व्यवहार कदापि स्वीकार्य हुन सक्दैन।
विशेषतः फागुन २१ गते सम्पन्न हुन गइरहेको प्रतिनिधिसभा निर्वाचन लोकतान्त्रिक अभ्यासको महत्वपूर्ण चरण हो। निर्वाचन स्वच्छ, निष्पक्ष र भयरहित वातावरणमा सम्पन्न हुनु सम्पूर्ण राजनीतिक दल, राज्य संयन्त्र तथा नागरिक समाजको साझा जिम्मेवारी हो। मतदाताको अधिकारको सम्मान गर्दै सबै पक्षले संयम, सहिष्णुता र कानुनी मर्यादाको पालना गर्नु अत्यावश्यक छ।
त्यसैले हामी कानुनी राज्य र विधिको शासनका दृढ पक्षपाती हौं। यस्ता गैरकानुनी गतिविधिहरूलाई राज्य संयन्त्र, निर्वाचन आयोग, प्रहरी र प्रशासनले प्रभावकारी रूपमा नियन्त्रण र कारबाही गर्नुपर्छ। यदि समयमै नियन्त्रण नभए जनस्तरबाट उत्पन्न हुने प्रतिरोध वा प्रतिकारको नैतिक जिम्मेवारी राज्य र यस्ता गतिविधिमा संलग्न पक्षले नै वहन गर्नुपर्नेछ।
लोकतान्त्रिक मूल्य, विधिको शासन, शान्तिपूर्ण प्रतिस्पर्धा र मतदाताको स्वतन्त्र निर्णयको अधिकारको रक्षा गर्नु आजको अपरिहार्य आवश्यकता हो।
प्रतिक्रिया