फिफा विश्वकप : दोस्रो क्वाटरफाइनलमा स्पेन र बेल्जियम भिड्दै

काठमाडौं, असार २६ । फिफा विश्वकप-२०२६ अन्तर्गत आज हुने दोस्रो क्वाटरफाइनल खेलमा स्पेन र बेल्जियम भिड्दैछन् । लास एन्जेल्स स्टेडियममा हुने खेल नेपाली समय अनुसार राति १२:४५ बजे शुरु हुनेछ ।

आज हुने खेलमा दुवै टोली जित निकाल्दै सेमिफाइनल प्रवेश गर्ने लक्ष्यमा रहेका छन् । स्पेनले अन्तिम १६ मा पोर्चुगललाई १-० गोलले हराउँदै अन्तिम आठको यात्रा तय गरेको थियो । बराबरीतर्फ लम्किएको खेलको इन्जुरी समयमा मिकेल मेरिनोले गोल गर्दै स्पेनलाई जित दिलाएका थिए ।

युरो २०२४ मा क्रोएसिया, इटालीम जर्मनी फ्रान्स र इंग्ल्याण्डलाई हराउँदै उपाधि जितेको स्पेनले जारी विश्वकपमा आफ्नो उत्कृष्ट प्रदर्शन देखाउन संघर्ष गरिराखेको छ । स्पेनले जारी विश्वकपको सबै पाँच खेलमा क्लिन सिट राखेको छ ।

यता बेल्जियमलेपनि सह-आयोजक अमेरिकालाई ४-१ गोलले हराउँदै क्वाटरफाइनलमा आफ्नो स्थान सुरक्षित गरेको थियो । समूहचरणको शुरुवाती दुई खेलमा बराबरी खेल्दै विश्वकपको शुरुवात गरेको बेल्जियमले त्यसपछिको तीन खेलमा १२ गोल गरेको छ ।

आजको खेलको विजेताले सेमिफाइनलमा फ्रान्ससँग खेल्नेछ । फ्रान्सले गएराति भएको खेलमा मोरोक्कोलाई हराउँदै सेमिफाइनलमा आफ्नो स्थान पक्का गरेको थियो ।