चितवन,१८ साउन । चितवनको भरतपुर अस्पतालमा प्रसूति शय्या अभाव हुँदा सुत्केरीपश्चातको सेवा ‘म्याट्रेस’ राखेर दिनुपर्ने अवस्था आएको छ।
गत असार दोस्रो साताबाट आगामी भदौसम्म अस्पतालमा सुत्केरी सेवा लिनेको उच्च चाप हुने गर्छ। अस्पतालमा प्रसूतिसँग सम्बन्धित शय्याहरू १११ वटा छन्।
प्रसूति शल्यक्रियापछि राख्ने ‘गाइने’को ‘पोस्टअप’ २३ शय्या, गाइने शय्या २३, जटिल गाइने १०, प्रसूतिपछि राख्ने ‘पोस्टनेल’ २३, प्रसूति भर्ना चार, प्रसूति ‘वेटिङ’ १५, प्रसूति ‘एक्टिभ’ पाँच, ‘लेबर’ तीन र ‘बर्थिङ युनिट’ पाँच शय्या छन्।
वरिष्ठ प्रसूति रोग विशेषज्ञ सहप्रध्यापक डा. रामप्रसाद सापकोटाका अनुसार अस्पतालमा दैनिक ४० देखि ५० जनाको प्रसूति गराउने गरिएको छ। सुत्केरी हुनुअघि औषधि चलाउँदा शय्यामा राखेर मात्र चलाउने गरिएको छ। त्यसअघि पालो कुर्नका लागि भुइँमा ‘म्याट्रेस’मा राख्न बाध्य भएको उनले बताए।
चितवनसहित छिमेकी जिल्लाका प्रसूति सेवा लिनेहरूको पहिलो रोजाइ भरतपुर अस्पताल हुने गर्छ। अनुभवी नर्सिङ सेवासँगै विज्ञ चिकित्सक र बाल सघन उपचार कक्ष भएकाले प्रसूति गराउनेहरूको रोजाइ भरतपुर अस्पताल हुने गर्छ।
अस्पतालका प्रवक्तासमेत रहेका उनले भने, ‘अन्य मौसममा प्रसूति गराउन आउनेको संख्या कम हुने भएकाले सहजै शय्या पाउने भए पनि यो समयमा गाह्रो हुने गरेको छ।’
यही समयका लागि मात्रै शय्या व्यवस्थापन गर्न कठिन हुने भएकाले गर्भवतीले सहज सुविधा पाउन गाह्रो भएको उनले बताए। वरिष्ठ प्रसूति रोग विशेषज्ञ सापकोटाका अनुसार असोज, कात्तिक महिनामा दसैँ र तिहारजस्ता पर्व मनाउन घरबाहिर रहेकाहरू घरमा आउने गर्छन्।
सोही समयमा गर्भ बसेकाहरूको यो समयमा सुत्केरी हुन्छ। सोही कारणले यो समयमा प्रसूति गराउनेहरूको संख्या बढेको हुन सक्ने जनाइएको छ।
अस्पतालमा १० जना विशेषज्ञ चिकित्सक र २९ जना नर्सिङ सेवाका तालिमप्राप्त कर्मचारी छन्। यसकारण सुत्केरी गराउनेहरूलाई अन्यत्रभन्दा सहज हुने गरेको उनको भनाइ छ। अस्पतालमा नै २० शय्याको बाल सघन उपचार कक्ष र चार शय्याको ‘कङ्गारु मदर केयर’ पनि रहेको छ।
अस्पतालमा दक्ष ‘नर्स’ र ‘मिड वाइफ’ले मात्र नजजात शिशु निकाल्न सहयोग गर्ने पाँच शय्याको बर्थिङ युनिट छ। प्रसूति सेवामा यस अस्पताललाई प्रसूति गृहपछिको व्यवस्थित र विश्वासिलो रूपमा लिने गरिन्छ।
प्रवक्ता डा. सापकोटाले गत आर्थिक वर्षमा ७ हजार ८५३ जनाले अस्पतालबाट प्रसूति सेवा लिएको जानकारी दिए। उनका अनुसार तीमध्ये ४ हजार २३५ जनाको सामान्यस्तरबाट बच्चा निकालिएको हो भने ३ हजार ५४० जनाको शल्यक्रिया गरेर बच्चा निकालिएको हो। ७० जनाको ‘भ्याकुम’ र ‘फोर्सएप’ नामक उपकरण प्रयोग गरेर शिशु झिकिएको छ।
अघिल्लो आर्थिक वर्षमा ८ हजार ४२० जना आमाले भरतपुर अस्पतालमा प्रसूति सेवा लिएका थिए। तीमध्ये ३ हजार ८२५ जनाको शल्यक्रिया गरेर शिशु झिकिएको हो भने ४ हजार ४०८ जनाको सामान्य तरिकाले बच्चा निकालिएको हो। १८७ जना आमाको उपकरण प्रयोग गरी सुत्केरी गराइएको थियो।
गत वर्ष ४५ प्रतिशतको शल्यक्रिया गर्नुपरेको थियो भने अघिल्लो आर्थिक वर्षमा यो प्रतिशत ४५.४ रहेको थियो। जटिल प्रकृतिका समेत धेरै हुने भएकाले शल्यक्रियाको प्रतिशत अस्पतालमा बढी हुने गरेको उनको भनाइ छ।
प्रतिक्रिया