पशुपतिनाथमा दर्शनार्थीको घुइँचो: हरियो-पहेंलो वस्त्रमा सजिए भक्तजन

काठमाडौँ । पवित्र साउन महिनाको सोमबारका अवसरमा आज देशकै प्रमुख धार्मिक स्थल पशुपतिनाथ मन्दिरमा बिहानैदेखि भक्तजनहरूको ठूलो भीड लागेको छ। भगवान् शिवको प्रिय मानिने साउन महिनाको सोमबार पूजा-आराधना र दर्शनका लागि पशुपति क्षेत्रमा श्रद्धालुहरूको उत्साहजनक उपस्थिति देखिएको छ।

विशेष गरी महिलाहरू हरियो तथा पहेंलो वस्त्र र चुरा-पोतेमा सजिएर पशुपति परिसर पुगेका छन्। दिनभरि नै पशुपतिनाथ मन्दिर वरपर भक्तजनको बाक्लो चहलपहल र लाइन कायम रहेको छ।

शास्त्र अनुसार साउनको सोमबार शिवजीको बार भएकाले यस दिन भगवान् शंकरको पूजा, आराधना र शुद्ध जल अर्पण गर्दा विशेष फल प्राप्त हुने विश्वास गरिन्छ। साउनको सोमबार व्रत बसेर पशुपतिनाथको दर्शन गर्नाले मनोकांक्षा पूरा हुने, पारिवारिक सुख-शान्ति मिल्ने र अटल सौभाग्य प्राप्त हुने धार्मिक मान्यता रहँदै आएको छ।

पशुपतिनाथलगायत देशभरका अन्य शिवालयहरूमा पनि आज बिहानैदेखि दर्शनार्थीहरूको ठूलो उपस्थिति रहेको छ। पशुपति क्षेत्र विकास कोषले भक्तजनको सहज दर्शनका लागि शान्ति-सुरक्षा तथा लाइन व्यवस्थापनको विशेष प्रबन्ध मिलाएको जनाएको छ।