खोटाङ, २७ साउन । हलेसी तुवाचुङ नगरपालिकाले ग्रामीण सडकमा बाह्रै महिना यातायात सञ्चालन गर्न सडक हेरालु परिचालन भएका छन् । बर्सातको समयमा अत्यधिक वर्षा हुने र ग्रामीण सडकहरू निरन्तर क्षतिग्रस्त भएर यातायात अवरुद्ध हुने अवस्थालाई मध्यनजर गर्दै अवरुद्ध सडक बाह्रै महिना सञ्चालन गर्न नगरपालिकाले २६ जना सडक हेरालु नियुक्त गरेर परिचालन गरेको हो ।
विगत वर्षमा सडक मर्मत गर्नका लागि मेसिन प्रयोग गर्दै आएको नगरपालिकाले चालु अर्थिक वर्षदेखि मेसिनको सट्टा सडक हेरालुको रूपमा मान्छेको प्रयोग सुरु गरेको छ । एघार वडा रहेको यो नगरपालिकामा सडक मर्मतमा मात्र वार्षिक रु एक करोडको हाराहरीमा खर्च हुँदै आएको थियो ।
सडक मर्मत तथा सम्भारको नाममा नगरपालिका र वडा कार्यालयले मेसिन (स्काभेटर तथा जेसिबी) प्रयोग गर्नका लागि बजेट विनियोजन गर्दै आएको थियो । नगरपालिकाले एक जनाले मासिक रु २१ हजार पारिश्रमिक पाउने गरी २६ जना हेरालुलाई पहिलो चरमा तीन महिनाका लागि नियुक्ति दिएको हो ।
सडक हेरालुलाई सडकको रेखदेख गर्ने, सम्भावित जोखिमयुक्त स्थानको पहिचान गरी नाली सरसफाइ गर्ने, खाल्डाखुल्डी पुर्ने, सडकमा आएको क्षति तत्काल मर्मत गर्ने तथा आवश्यक परे सम्बन्धित निकायलाई जानकारी गराउने जिम्मेवारी दिइएको छ । नगरपालिकाले नियुक्त गरेको सडक हेरालुले जनघनत्व बढी भएका बस्ती आसपास तथा सर्वसाधारणले बढी उपयोग गर्ने सडक छानेर मर्मत गर्ने जनाइएको छ ।
सम्बन्धित सडक आसपास बसोबास गर्ने तथा आर्थिक रूपमा विपन्न परिवारका व्यक्तिलाई प्राथमिकता दिने मापदण्ड बनाएर वडाको सिफारिसको आधारमा सडक हेरालु नियुक्त गरिएको नगरप्रमुख विमला राईले जानकारी दिए । “विगत वर्षमा सडक मर्मतका लागि मेसिन प्रयोग गर्दा नगरपालिका र वडाले ठूलो बजेट खर्च गर्यौँ । त्यसले दीर्घकालीन समाधान दिन नसकेपछि यसपटक सडक हेरालु नियुक्त गरिएको छ”, उनले भने, “मेसिनले एकपटक मर्मत गरिएका सडकहरू वर्षापछि पुनः बिग्रिने समस्या दोहोरिएको थियो । सडक हेरालुको नतिजा फलदायी देखिए सङ्ख्यासमेत वृद्धि गर्ने र कार्यक्रमलाई निरन्तरता दिने योजना बनाएका छौँ ।”
भूगोलका आधारमा ठूला क्षेत्रफल रहेका चार वडा बाहुनीडाँडा, डिकुवा, दुर्छिम र राजापानीमा तीन/तीन जना र अन्य सात वडामा दुई/दुई जनाका दरले हेरालु नियुक्ति गरिएको छ । मानवीय जनशक्ति प्रयोग गरेर सडकलाई चुस्त तथा दुरुस्त राख्ने लक्ष्यका साथ नगरपालिकाले आर्थिक वर्ष २०८३/८४ को नीति तथा कार्यक्रममा सडक हेरालु नियुक्त गरेर परिचालन गर्ने प्रस्ताव पारित गरेको थियो ।
दश स्थानीय तह रहेको जिल्लामा अहिले अविरल वर्षाका कारण अधिकांश ग्रामीण सडकमा यातायात सेवा अवरुद्ध रहेका छन् । जिल्लाको दोस्रो ठूलो स्थानीय तह हलेसी तुवाचुङ नगरपालिकामा भने, सडक हेरालुका कारण सबै वडामा सहजरूपमा यातायात सञ्चालन भइरहेको स्थानीयले बताएका छन् ।
जिल्लाका अन्य स्थानीय तहले हरेक वर्ष आ–आफ्नो क्षेत्रभित्रका ग्रामीण सडक मर्मतका लागि करोडौँ रकम खर्च गर्दै आएका छन् । मेसिन प्रयोग गरेर मर्मत गरिएका सडक पुनः अर्को वर्ष बर्सातको भलबाढीले खोलेर त्यही अवस्थामा पुर्याउने गरेको स्थानीयवासीले बताउँदै आएका छन् ।
प्रतिक्रिया