इजरायली कफ्र्यूले ४० हजार प्यालेस्टिनी प्रभावित

संयुक्त राष्ट्रसङ्घ, ४ भदौ । दक्षिणी वेस्ट ब्याङ्कमा इजरायलले सञ्चालन गरेको सैन्य कारबाहीका क्रममा करिब ४० हजार प्यालेस्टिनीलाई घरबाहिर निस्कन रोक लगाइएपछि उनीहरूको दैनिक आवश्यकता र अत्यावश्यक सेवामा पहुँच प्रभावित भएको संयुक्त राष्ट्रसङ्घले जनाएको छ ।

संयुक्त राष्ट्रसङ्घीय मानवीय मामिला समन्वय कार्यालय (ओसीएचए) का अनुसार हेब्रोन प्रान्तको अध धाहिरियामा सडक अवरुद्ध गर्नुका साथै भवनका छतमा स्नाइपर तैनाथ गरिएको थियो । करिब सात प्यालेस्टिनी घरलाई सोधपुछ केन्द्रका रूपमा प्रयोग गरिएको र धेरैलाई पक्राउ गरिएको रिपोर्टसमेत प्राप्त भएको कार्यालयले जनाएको छ ।

कफ्र्यूका कारण स्थानीय बासिन्दाले खाद्यान्न तथा अन्य आवश्यक सामग्री जुटाउन, सेवा लिन र काममा जानसमेत नसकेको ओसीएचएले बताएको छ । कार्यालयले सुरक्षा कारबाही सञ्चालन गर्दा नागरिकको सुरक्षा, मर्यादा र अन्तर्राष्ट्रिय कानूनको सम्मान गर्न आग्रह गरेको छ ।

यसैबीच, संयुक्त राष्ट्रसङ्घका महासचिव एन्टोनियो गुटेरेस अधिकृत वेस्ट ब्याङ्कमा नयाँ इजरायली बस्ती चौकी स्थापना भइरहेको रिपोर्टप्रति गम्भीर रूपमा चिन्तित रहेको उनका प्रमुख प्रवक्ता स्टेफन डुजारिकले बताएका छन् । उनले इजरायललाई यस्ता गतिविधिबाट टाढा रहन आग्रह गरेका छन् ।

गाजामा पनि इजरायली सैन्य गतिविधि जारी रहेको ओसीएचएले जनाएको छ । प्रारम्भिक विवरणअनुसार मङ्गलबार गाजा सहरको बन्दरगाहमा भएको हवाई आक्रमणमा कम्तीमा सात जनाको मृत्यु भएको थियो । घटनाले नागरिकको सुरक्षा तथा स्वास्थ्य र मानवीय सहायता प्राप्त गर्ने पहुँचमा थप जोखिम सिर्जना गरेको कार्यालयले जनाएको छ । रासस