धादिङ । भोटेकोशी र त्रिशूलीको बाढीबाट प्रभावित धादिङको गल्छी र गजुरी गाउँपालिकामा विपद्मा परेका १७२ घरपरिवारलाई ‘जेनजी चितवन’ले राहत वितरण गरेको छ । स्वतन्त्र नागरिक अभियानका अध्यक्ष ऋषि धमलाको पहल र युवा नेतृत्व आशिष सापकोटाको कुशल व्यवस्थापनमा सम्पन्न यो मानवीय सहायताले संकटका बेला राज्यको मुख नताकी नागरिक तहबाट कसरी द्रुत र प्रभावकारी समाधान दिन सकिन्छ भन्ने ज्वलन्त उदाहरण खडा गरिदिएको छ।
तीनै तहका सरकारले राहत सामग्री पुर्याउन ढिलासुस्ती गरिरहँदा धादिङका बाढीप्रभावित बस्तीमा भोक र त्रासको वातावरण छाएको थियो। यस्तो संवेदनशील घडीमा चितवनका तन्नेरीहरू स्वतःस्फूर्त रूपमा राहत संकलन, ढुवानी र वितरणको जटिल शृङ्खला आफैँ सम्हाल्दै धादिङको भूगोलमा ओर्लिएका हुन्। अध्यक्ष धमलाको समन्वय, स्पष्ट दृष्टि र उत्प्रेरणादायी अभियानले यस प्रयासलाई नतिजामुखी बनाउन निर्णायक भूमिका खेल्यो। उनको सार्वजनिक आह्वान र सहजीकरणलाई संस्थाका अध्यक्ष आशिष सापकोटाले मैदानमै उत्रिएर चुस्त कार्यान्वयनमा ढालेपछि पीडितहरूले तत्काल खाद्यान्न र मनोसामाजिक हौसला दुवै प्राप्त गरे।
प्रायः सामाजिक सञ्जालमा बहस गर्ने र डिजिटल मिडियामा मात्र सीमित रहने भनी आलोचना खेप्ने गरेको नयाँ पुस्ता (जेनजी) ले आफ्नो सामाजिक दायित्व केवल भर्चुअल दुनियाँमा मात्र सीमित छैन भन्ने यो राहत वितरणबाट प्रमाणित गरिदिएको छ। चितवनबाट धादिङसम्मको दूरी तय गरेर गल्छी र गजुरीका प्रभावित बस्तीमा राहतको मलम लगाउने यो कदम केवल खाद्यान्न वितरणमा मात्र सीमित छैन, यसले नेपाली युवावर्ग समस्याका टिप्पणीकार मात्र नभई सामाजिक समाधानका अग्रणी साझेदार पनि हुन् भन्ने सन्देश दिएको छ। अध्यक्ष सापकोटाको परिपक्व, जुझारु र उर्जावान् नेतृत्वमा रातदिन नभनी खटिएका तन्नेरीहरूले संकटका बेला कसरी छरितो र पारदर्शीरूपमा कार्यसम्पादन गर्न सकिन्छ भन्ने नमुना प्रस्तुत गरेका छन्।
आफ्नो प्रशासनिक र भौगोलिक सीमाभन्दा बाहिर गएर देखाइएको यो अभूतपूर्व सहकार्यले नेपाली समाजमा परापूर्वकालदेखि रहँदै आएको परोपकार र छिमेकीपनको भावनालाई आधुनिक युवा पुस्तामा पुनः जीवित गराएको छ। युवा टोलीको यो सहकार्यले प्राकृतिक विपत्तिको संकटमा एक–अर्काको हात थाम्ने संस्कृतिको जग पुनः मजबुत बनाएको छ। सरकारी निकायको मात्र बाटो हेर्दा पीडितहरू झन् जोखिममा पर्ने यथार्थलाई चिर्दै नागरिक स्तरबाट लिइएको यो पहलकदमी आगामी दिनमा विपद् व्यवस्थापनका लागि समेत प्रेरणादायी मार्गदर्शन बनेको छ।
प्रतिक्रिया