काठमाडौ । नेकपा एमालेका अध्यक्ष केपी शर्मा ओलीले महासचिव शंकर पोखरेललाई बैठक सञ्चालन गर्न नदिई सोमबारदेखि सुरु भएको केन्द्रीय कमिटी बैठक आफैं सञ्चालन गरेका छन्।
ललितपुरको भनिमण्डलमा सुरु भएको बैठकमा अध्यक्ष ओलीले उद्घाटन मन्तव्य राखेपछि महासचिव पोखरेलले बैठक सञ्चालन गर्ने अपेक्षा गरिएको थियो। तर, ओलीले नै बैठकलाई निरन्तरता दिएका हुन्।
एमालेको राजनीतिक इतिहासमा अध्यक्षले उद्घाटन मन्तव्यपछि महासचिवलाई बैठक सञ्चालन गर्न नदिएको यो पहिलो घटना भएको एक नेताले बताएका छन्। अध्यक्ष ओलीले बैठक सञ्चालन गरिरहेका बेला एमाले नेता कृष्णगोपाल श्रेष्ठले भने विरोध जनाएका छन्। उनी बैठकमा उभिएरै विधानअनुसार बैठक सञ्चालन गर्नुपर्ने भन्दै आपत्ति जनाएका थिए।
श्रेष्ठले बैठकमा भने, ‘नेकपा (एमाले) को विधान पढ्नुस्, यसरी विधानलाई मनलाग्दी चलाउन पाइँदैन।’ श्रेष्ठको विरोधपछि बैठकको सञ्चालन प्रक्रियालाई लिएर एमालेभित्रै असन्तुष्टि देखिएको छ। बैठकमा अध्यक्ष ओलीले महासचिवको भूमिकालाई पन्छाउँदै आफैंले कार्यसूची अघि बढाएपछि यस विषयले थप चर्चा पाएको हो।
प्रतिक्रिया