काठमाडौं । सञ्चारकर्मी सुमन सापकोटा काठमाडौंमा सम्मानित भएका छन्। विगत डेढ दशकदेखि सञ्चारकर्ममा सक्रिय सापकोटालाई लोक स्वर सम्राट राजु परियार तथा राष्ट्रिय लोक संचारकर्मी नेपालका अध्यक्ष चन्द्रमणी गौतमले सम्मान गरेका हुन्।
महक रेकर्डिङ स्टुडियोका सञ्चालक एमन खनालको अध्यक्षतामा आयोजित कार्यक्रममा राजु परियार प्रमुख अतिथिका रूपमा सहभागी थिए। गायक तथा प्रस्तुतकर्ता बिशु गुरुङ र गायिका मेलिना राईको स्वरमा रहेको नयाँ लोकगीत ‘मुग्लिङ बजारमा’ विमोचन गरिएको थियो । संचारकर्मी सापकोटाले यसअघि पनि विभिन्न राष्ट्रिय तथा अन्तर्राष्ट्रिय संस्थाबाट सम्मान प्राप्त गरिसकेका छन्। तेस्रो हिमालयन अन्तर्राष्ट्रिय अवार्ड–२०७९ मा उनलाई तत्कालीन परराष्ट्रमन्त्री एनपी साउदले दोसल्ला, माला र सम्मानपत्रसहित ‘गीत–संगीत कला पत्रकारिता सम्मान–२०७९’ प्रदान गरेका थिए।
त्यस्तै, काठमाडौंको जमलस्थित सांस्कृतिक संस्थानमा आयोजित चौथो जिनियस म्युजिक अवार्ड–२०७९ मा सापकोटालाई ‘पत्रकारिता सम्मान’ प्रदान गरिएको थियो। सापकोटा अमेरिकाको नर्दन क्यालिफोर्नियास्थित नीलकृष्ण जशोदा सिटौला फाउन्डेसनबाट ‘नीलकृष्ण जशोदा युवा पत्रकारिता शीर्ष सम्मान–२०८०’ बाट समेत सम्मानित भएका छन्। एभिन्यूज टेलिभिजन, गोर्खा एफएम, रेडियो देशान्तर, देशान्तर डटकम, सूत्र न्युज तथा ओएस नेपाललगायत सञ्चारमाध्यममा काम गरिसकेका सापकोटा पछिल्लो एक दशकदेखि व्यवस्थापिका संसद् रिपोर्टिङमा सक्रिय छन्।
प्रतिक्रिया