जापानमा ६ महिना जीवनसँग संघर्ष गरेकी विष्णुलाई स्वदेशमा डा. सुनिल शर्माको मानवीय साथ


काठमाडौँ । परदेशमा उज्ज्वल भविष्यको सपना बोकेर जापान पुगेकी २२ वर्षीया विष्णु कुँवरका लागि पछिल्ला ६ महिना निकै कष्टकर बने । रोजगारी गर्दै आफ्नो भविष्य निर्माण गर्ने उद्देश्यसहित जापान पुगेकी उनी अचानक मस्तिष्कघातको सिकार भइन् । त्यसपछि उनको जीवनको यात्रा सपनाबाट संघर्षतर्फ मोडियो । स्वास्थ्य अवस्था जटिल बन्दै जाँदा उपचारको चुनौती थपियो भने आर्थिक अभावले उनलाई झनै असहज परिस्थितिमा पुर्‍यायो ।

विदेशी भूमिमा बिरामी परेकी विष्णुका लागि उपचारलाई निरन्तरता दिनु मात्रै होइन, आफ्नै देश फर्किनु पनि सहज थिएन । तर, कठिन परिस्थितिमा सहयोगी हात अघि बढेपछि उनी अन्ततः स्वदेश फर्किन सफल भएकी छन् ।

सोमबार नेपाल आइपुगेकी विष्णुको सिनामंगलस्थित काठमाडौँ मेडिकल कलेज शिक्षण अस्पताल (केएमसी) मा निःशुल्क उपचार सुरु भएको छ । नेपाली कांग्रेसका नेता तथा गिरिजाप्रसाद कोइराला फाउन्डेसनका सभापति डा. सुनिलकुमार शर्माको पहलमा उनलाई जापानबाट नेपाल ल्याइएको हो ।

नेपाल एयरलाइन्सको विमानमार्फत त्रिभुवन अन्तर्राष्ट्रिय विमानस्थल आइपुगेकी विष्णुलाई लिन डा. शर्मा केएमसीका विशेषज्ञ चिकित्सक र एम्बुलेन्ससहित विमानस्थल पुगेका थिए । विमानस्थलबाट उनलाई सिधै अस्पताल पुर्‍याएर भर्ना गरिएको छ । अस्पतालले उनको स्वास्थ्य अवस्थाको विस्तृत परीक्षण गरी उपचार अघि बढाएको जनाएको छ ।

स्वदेश फर्किएपछि विष्णुले डा. शर्मालाई आफू कहाँ रहेको भन्दै प्रश्न गरेकी थिइन् । जवाफमा डा. शर्माले ‘तपाईं आफ्नै देशको काठमाडौँ मेडिकल कलेजमा हुनुहुन्छ’ भनेपछि उनी भावुक बनेकी थिइन् । लामो समय विदेशी भूमिमा स्वास्थ्य र आर्थिक संकटसँग जुधेकी युवतीका लागि आफ्नै देश फर्किनु र उपचारको सुनिश्चितता पाउनु आफैँमा ठूलो राहत बनेको छ ।

उपचार खर्चको जिम्मेवारी डा. शर्माले लिए

विष्णुको उपचारमा लाग्ने सम्पूर्ण खर्च अस्पतालबाट डिस्चार्ज नहुँदासम्म आफूले बेहोर्ने डा. शर्माले घोषणा गरेका छन् । चिकित्सा विज्ञानले सम्भव भएसम्मका सबै उपचार सेवा केएमसीमा निःशुल्क उपलब्ध गराइने उनको प्रतिबद्धता छ ।

‘आर्थिक अभावकै कारण कुनै पनि बिरामी उपचारबाट वञ्चित हुनु हुँदैन,’ डा. शर्माको भनाइ छ ।

स्वास्थ्य सेवामा डा. शर्माको निरन्तर योगदान

डा. सुनिलकुमार शर्मा स्वास्थ्य सेवा र सामाजिक क्षेत्रमा लामो समयदेखि सक्रिय रहँदै आएका छन् । काठमाडौँ मेडिकल कलेज र नोबेल मेडिकल कलेजमार्फत उनले स्वास्थ्य सेवाको पहुँच विस्तारमा काम गर्दै आएका छन् । विशेषगरी आर्थिक अवस्था कमजोर भएका, उपचार खर्च जुटाउन नसक्ने तथा विपन्न समुदायका बिरामीलाई निःशुल्क उपचार उपलब्ध गराउने अभियानमा उनको संलग्नता रहँदै आएको छ ।

उनको पहल केवल अस्पतालमा उपचार गराउने कार्यमा मात्र सीमित छैन । विपन्न, दलित तथा अल्पसङ्ख्यक समुदायका विद्यार्थीलाई निःशुल्क स्वास्थ्य शिक्षा प्रदान गर्ने कार्यमा समेत उनी सक्रिय छन् । आर्थिक अभावका कारण चिकित्सा शिक्षा हासिल गर्ने सपना अधुरो नहोस् भन्ने उद्देश्यले यस्ता कार्यक्रम सञ्चालन हुँदै आएका छन् ।

केएमसी र नोबेल मेडिकल कलेजमार्फत विभिन्न स्वास्थ्य शिविर, विशेषज्ञ चिकित्सकसहितको स्वास्थ्य सेवा तथा आर्थिक रूपमा कमजोर बिरामीलाई उपचारमा सहयोग पुर्‍याउने कामले पनि उनको सामाजिक सक्रियतालाई जोडेको छ ।