काठमाडौं, २६ साउन । सत्तारुढ नेपाल कम्युनिष्ट पार्टी (नेकपा) का प्रवक्ता नारायणकाजी श्रेष्ठले पार्टीभित्र आन्तरिक लोकतन्त्र सुनिश्चित हुनु पहिलो शर्त भएको बताएका छन् । सामाजिक सञ्जाल फेशुबकमार्फत प्रवक्ता श्रेष्ठले यस्तो बताएका हुन् । सहमतिको लागि खुल्ला र स्पष्ट छलफल आवश्यक रहेको उनले औंल्याएका छन् । तर, भित्र एउटा कुरा र बाहिर अर्को कुरा र एक ठाउँमा एउटा कुरा र अर्को ठाउँमा अर्को कुरा गर्ने प्रवृत्तिले पार्टीमा सहमति हुन नसकेको उनको भनाई छ ।
हेरौं श्रेष्ठले के लेखेका छन् ?
कम्युनिष्ट पार्टीको उदेश्य समाजमा आज सम्मको सर्वोत्तम लोकतन्त्रको अभ्यास गर्नु,गराउनु हो ।त्यसका लागि पार्टी भित्र आन्तरिक लोकतन्त्र सुनिश्चित हुनु पहिलो शर्त हो।अत: क पा भित्र अन्तरपार्टीजनवाद,छलफल ,बहस र अन्तरसंघर्स लाई पार्टीको जीवन र चालक शक्ति भनिन्छ। अन्तरसंघर्षलाई स्वस्थ र रुपान्तरणमुखी ढँगले सञ्चालन गर्नाले बिचारको परिमार्जन एवं बिकास ,संगठनको ब्यबस्थापन ,परिचालन एवं सुदृढीकरण र सामाजिक रुपान्तरणको क्रान्तिकारी उदेश्यमा योगदान पुर्याउँछ ।
अन्तरसंघर्षलाई सार्थक निष्कर्षमा पुर्याउन बैचारिक ,सैध्दान्तिक ,राजनीतिक ,प्रवृत्तिगत र मुद्दागतरुपमा सिधा,खुला र स्पष्ट छलफल गर्ने कार्यशैली अख्तियार गर्नुपर्छ ।हाम्रो पार्टीभित्रको अहिलेको एउटा समस्या सिधा र खुला छलफल गर्नुको सट्टा भित्र एउटा कुरा ,बाहिर अर्को कुरा र एक ठाँउमा एउटा कुरा,अर्को ठांउमा अर्को कुरा गर्ने प्रवृत्ति पनि हो ।त्यसले समस्या समाधान गर्न सहयोग गर्दैन ,बरु जटील बनाउछ।त्यसैले पार्टी, बर्ग,आन्दोलन, देश र जनतालाई केन्द्रबिन्दुमा राखी सिधा,खुला र स्प्ष्टरुपमा छलफल गरौं र सकारात्मक निकास निकालौं।पार्टी एकताको रक्षा गरौं,समाजवादउन्मुख सामाजिक-आर्थिक रुपान्तरण गर्दै समाजवादको बाटोमा अघि बढौं । file photo/ReportersNepal
