Logo

को बन्ला वैशाखमा आइजीपी ?



काठमाडौं, २ चैत्र । नेपाल प्रहरीको एआइजीमा तीन डिआइजी बढुवामा सिफारिश भएलगत्तै भावी आइपीको दौड रोचक देखिएको छ । बढुवा सिफारिश भएकामध्ये दुईजना डिआइजी पनि आइजीपीको दौडमा देखिएका छन् ।

एआइजीमा बढुवा सिफारिश भएका धीरज प्रताप सिंह र रविन्द्र बहादुर धानुक पनि भावी आइजीपीको दाबेदार बनेका छन् । उनीहरु एआइजीहरु विश्वराज पोखरेल र सहकुल थापाको ब्याची हुन् ।

आइजीपी शैलेश थापा क्षेत्री १९ वैशाख २०७९ मा ३० वर्षे सेवा अवधिका कारण घर जाँदैछन् । अहिलेको प्रहरीको ३० वर्षे नियमावली अनुसार आइजीपी क्षेत्रीसँगै एआइजीहरु हरिबहादुर पाल, निरजबहादुर शाही र प्रद्युम्न कार्की पनि सेवानिवृत्त हुनेछन् । १ चैत्रमा एआइजी बढुवामा सिफारिश भएका वसन्त पन्त पनि ३० वर्षे सेवा अवधिका कारण घर जानेछन् ।

एआइजीहरुमध्ये हाल एक नम्बरमा रहेका विश्वराज पोखरेल, सहकुल थापा र धीरज प्रताप सिंहबीच प्रतिष्पर्धा हुने देखिन्छ । रविन्द्र धानुक पनि प्रतिष्पर्धामा देखिनेछन् ।

पोखरेल र थापाले केपी शर्मा ओली प्रधानमन्त्री हुँदा बढुवाको अवसर पाएका थिए । दरबन्दी समेत बढाएर उनीहरुलाई बढुवा गरिएको थियो । धीरज प्रताप सिंहले शेरबहादुर देउवा प्रधानमन्त्री हुँदा दरबन्दी बढाएर बढुवाको अवसर पाउन लागेका छन् । यसकारण उनलाई देउवाको साथ रहेको देखिन्छ ।

सिंह सुदूरपश्चिमका हुन् । देउवाले आफ्नो क्षेत्रकालाई निकै संरक्षण गर्ने शैली देखाउँदै आएका छन् । विगतमा जयबहादुर चन्दलाई आइजीपी बनाउन देउवाले ठूलै संघर्ष गरेका थिए । त्यतिबेला उनी डिआइजी हुँदा तेस्रो वरियतामा थिए ।

स्थानीय निकायको चुनाव ३० वैशाखमा हुने भएकाले अब हुने आइजीपीको कार्यकाल महत्वपूर्ण हुनेछ । अबको आइजीपीको पालामा तीन तहको चुनाव हुँदैछ । यसकारण पनि आइजीपीमा देउवाले आफूले चाहेको एआइजीलाई बढाउन सक्छन् । सिंह यसकारण पनि उत्साही रहेको बुझिएको छ । उनलाई बालुवाटारबाट ग्रिन सिग्नल पुगिसकेको विश्वस्त स्रोतले जनाएको छ ।

आइजीपीको बलिया दाबेदार विश्वराज पोखरेल पनि अहिले देखि नै सक्रियता बढाइरहेका छन् । उनी डिआइजी र एआइजी हुँदा आफ्ना ब्याचीमध्ये सर्वप्रथम बढुवा भएका थिए । उनले सिनियरहरुलाई नै पछि पारेका थिए । सहकुल थापाले पनि सिनियरलाई पछि पारेका थिए । यसकारण आइजीपीको दौड रोचक मोडमा पुगेको छ ।



प्रतिक्रिया दिनुहोस्