काठमाडौँ,३० जेठ । मधेस प्रदेशका प्रदेशसभा सदस्य पश्मिना कादरीले पर्साको वीरगञ्जस्थित नापी कार्यालयलाई आवश्यक कम्प्युटर र प्रिन्टर उपलब्ध गराएका छन् ।
सो कार्यालयबाट प्रवाह हुने सेवा सुविधालाई थप प्रभावकारी बनाउन उनले व्यक्तिगत खर्चबाट करिब रु तीन लाख २० हजार १२९ बराबरको चार थान कम्प्युटर र रु एक लाख ६९ हजार ५०० बराबरको दुई थान को प्रिन्टर उपलब्ध गराएको हो ।
उनी नेपाल कम्युनिष्ट पार्टी (माओवादी केन्द्र) को समानुपातिकतर्फ प्रदेशसभा सदस्य छन् । नापी कार्यालयका प्रमुख नारायण कुमार श्रेष्ठले उपलब्ध सामग्रीबाट सेवा प्रवाहमा सहज हुने जानकारी दिए ।
कार्यालयको आवश्यक कागजातको कम्प्युटर प्रणालीमा अभिलेखीकरण नहुँदा सेवा प्रवाहमा ढिलाइ हुँदै आएको थियो । अब विस्तार सेवा प्रवाह सुधार आउने कार्यालयले जनाएको छ ।
विद्यालय भवन निर्माण सुरु
जिल्लाको बिन्दवासिनी गाउँपालिका–२ स्थित राधाकृष्ण माध्यमिक विद्यालयको चारकोठे भवन निर्माण सुरुआत भएको छ । उक्त भवन निर्माणका लागि राष्ट्रपति शैक्षिक सुधार कार्यक्रमअन्तर्गत रु ३६ लाख सहयोग गरेको गाउँपालिकाका प्रमुख प्रशासकीय अधिकृत राजु साहले जानकारी दिए । भौतिक संरचना कमजोर भएका विद्यालयका भवन निर्माणमा सहयोग गर्दै जाने गाउँपालिकाका अध्यक्ष प्रमोद तिवारीले जानकारी दिए । रासस
