Logo

मधेस प्रदेशसभामा केही पुराना र केही नयाँ अनुहार



धनुषा, मंसिर १० ।  मधेस प्रदेश सभामा यस पटक केही पुराना र केही नयाँ अनुहारलाई जनताले जनप्रतिनिधिका रुपमा चयन गरेका छन् । फरक दल, फरक समुदाय, फरक उमेर र फरक वर्गको प्रतिनिधित्व यस पटक मधेस प्रदेशसभा देखिने भएको छ ।

http://www.adbl.gov.np

प्रदेशसभामा प्रत्यक्ष निर्वाचित ६४ र समानुपातिक ४३ गरी जम्मा एक सय सात प्रदेशसभा सदस्य चुनिने छन् । अघिल्लो निर्वाचनमा चुनिएका कतिपय सांसद यसपटक पनि पुनः दोहोरिएका छन् । पहिलो अनुभव लिनेको सङ्ख्या पनि उल्लेख्य छ । मुख्यमन्त्री लालबाबु राउत फेरि दोहोरिएका छन् । जनता समाजवादी पार्टी (जसपा) का राउत पर्सा–१ को प्रदेशसभा (२) बाट निर्वाचित भए ।

कांग्रेस नेता रामसरोज यादव धनुषा–३ को प्रदेशसभा (१) बाट फेरि प्रदेशसभा सदस्यमा निर्वाचित भए । उनी यसअघि भौतिक पूर्वाधार तथा यातायातमन्त्रीसमेत भइसकेका छन् । लोकतान्त्रिक समाजवादी पार्टी (लोसपा) नेता जितेन्द्र सोनल पनि बारा–४ प्रदेशसभा (२) बाट दोस्रो पटक निर्वाचित भए । सोनल मधेस प्रदेशमा भौतिक पूर्वाधार तथा विकासमन्त्री भइसकेका छन् ।

पर्सा–२ को प्रदेशसभा (२) बाट लोसपाकै रमेशप्रसाद कुर्मी पनि फेरि निर्वाचित भए । विसं २०७४ को निर्वाचनमा कुर्मी तत्कालीन राजपाबाट निर्वाचित भएका थिए । पर्साकै अर्को क्षेत्र–४ प्रदेशसभा (१) बाट कांग्रेसका शङ्करप्रसाद चौधरी पनि दोस्रो पटक प्रदेशसभा सदस्यमा निर्वाचित भए । रौतहट–४ प्रदेशसभा (२) बाट जसपाका शेषअबुल कलाम आजाद पनि दोस्रो पटक निर्वाचित भए ।

यसैगरी, सर्लाहीबाट चारजना प्रदेशसभा सदस्य दोस्रो पटक निर्वाचित भए । सर्लाही–१ प्रदेशसभा (१) बाट लोसपाका उपेन्द्र महतो, १ प्रदेशसभा (२) बाट वेंची लुङेली, ३ प्रदेशसभा (२) बाट जसपाका सञ्जयकुमार यादव र ४ प्रदेशसभा (१) बाट कांग्रेसका वीरेन्द्रप्रसाद सिंहले प्रदेशसभामा पुनः निर्वाचित भए । कांग्रेसका सिंह यसअघि प्रदेशको महिला, बालबालिका, युवा तथा खेलकुदमन्त्रीसमेत भइसकेका छन् ।

त्यस्तै महोत्तरी–३ प्रदेशसभा (१) मा लोसपाबाट उम्मेदवार बनेका अभिराम शर्मा र ३ को प्रदेशसभा (२) बाट रानी शर्मा पुनः निर्वाचित भए । धनुषा–२ प्रदेशसभा (२) मा जसपाका रामाशिष यादव पनि दोस्रो पटक प्रदेशसभा सदस्यमा निर्वाचित भए । सप्तरी–३ प्रदेशसभा (१) मा कांग्रेसका मोहमद समिम पनि दोस्रो पटक निर्वाचित भए ।

नयाँ अनुहार

पर्सा–१ प्रदेशसभा (१) बाट निर्वाचित माओवादी केन्द्रका रहवर अन्सारी, पर्सा–२ प्रदेशसभा (१) बाट निर्वाचित कांग्रेसका श्यामप्रसाद पटेल र पर्सा–३ प्रदेशसभा (२) बाट जितेका कांग्रेसका जनार्दन सिंह क्षेत्रीको प्रदेशसभामा यो पहिलो यात्रा हो ।

यस्तै, बारा–३ प्रदेशसभा (१) बाट निर्वाचित एमालेका रवीन्द्रदास श्रेष्ठ र बाराकै क्षेत्र–४ प्रदेशसभा (१) बाट निर्वाचित एमालेका देवनारायण थारू पनि प्रदेशसभाका लागि नयाँ हुन् । रौतहटमा प्रदेशसभामा निर्वाचित सातजनामध्ये ६ नयाँ हुनुहुन्छ । क्षेत्र–१ प्रदेशसभा (१) बाट नागेन्द्र साह र १ प्रदेशसभा (२) बाट कृष्णप्रसाद यादव निर्वाचित भए । कांग्रेसका दुवै नेताको प्रदेशसभाको पहिलो यात्रा हो । कृष्ण यादव कांग्रेसका प्रदेश सभापति पनि हुन्।

यसैगरी, क्षेत्र–२ प्रदेशसभा (१) मा एमालेका मोहम्मद जैद आलम, क्षेत्र–२ प्रदेशसभा (२) बाट निर्वाचित कनिश पटेल, क्षेत्र–३ प्रदेशसभा (१) मा स्वतन्त्र उम्मेदवार केशव राय र क्षेत्र–४ प्रदेशसभा (१) मा निर्वाचित माओवादीका युवराज भट्टराई पनि नयाँहुन्। सर्लाही–४ प्रदेशसभा (२) मा माओवादीका फकिरा महतो र धनुषा–२ प्रदेशसभा (१) मा एमालेका लखनदास तत्मा निर्वाचित हुँदै पहिलो पटक प्रदेशसभा सदस्य बनेका छन् ।

सप्तरीका ६ स्थानको नतिजा आउँदा प्रदेशसभा पुग्ने पाँचजना नयाँ हुनुहुन्छ । यसमध्ये चारजना नयाँ पार्टी ‘जनमत पार्टी’ को हुन् । जसमा क्षेत्र–३ प्रदेशसभा (२) मा शम्भुकुमार साह, क्षेत्र–२ प्रदेशसभा (१) मा शतिशकुमार सिंह, क्षेत्र–२ प्रदेशसभा (२) मा महेशप्रसाद यादव र क्षेत्र–१ प्रदेशसभा (२) मा सकिल मियाँ निर्वाचित भए । क्षेत्र–१ प्रदेशसभा (१) मा जितेका एमालेका राजकुमार लेखी पनि नयाँ हुन्।

मन्त्री जो पराजित भए

विसं २०७४ मा निर्वाचित भई प्रदेशका महत्वपूर्ण मन्त्रालयको जिम्मेवारी सम्हाल्नुभएका केही मन्त्रीहरू भने यसपटक पराजित भए । भूमि व्यवस्था, कृषि तथा सहकारी मन्त्रालय हुँदै हाल अर्थमन्त्री रहेका शैलेन्द्र साह सप्तरी–२ प्रदेशसभा (१) बाट पराजित भए ।

यस्तै, भूमि व्यवस्था, कृषि तथा सहकारी राज्यमन्त्री रहनुभएका योगेन्द्र राय यादव पनि पराजित भए । उहाँ रौतहट–१ प्रदेशसभा (२) मा उम्मेदवार थिए । प्रदेश मुख्य न्यायाधिवक्ताबाट राजीनामा दिएर निर्वाचनमा होमिएका दीपेन्द्र झाले पनि पराजय व्यहोर्नु परेको छ ।



प्रतिक्रिया दिनुहोस्