रास्वपाले रूपन्देही-३ मा डा.लेखजंग थापालाई बनायो उम्मेदवार

काठमाडौं, १५ भदौ । आगामी कात्तिक १७ गते रूपन्देही–३ मा हुने उपनिर्वाचनमा राष्ट्रिय स्वतन्त्र पार्टी (रास्वपा) बाट डा.लेखजंग थापा उम्मेदवार भएका छन् । रूपन्देही–३ बाट उम्मेदवार बन्नका लागि रास्वपाबाट ९ जनाले उम्मेदवारी बन्न निवेदन दिएका थिए । रास्वपाको प्राइमरी इलेक्सनबाट उनी उम्मेदवारमा निर्वाचित भएका हुन् ।

उपनिर्वाचनका लागि थापासहित सुलभ खरेल, पार्थिवेन्द्र उपाध्याय, ज्ञानु पौड्याल, जीतबहादुर गुप्ता, कुसुम महर्जन, रचना क्षेत्री, पुनमकुमारी अग्रवाल र मधुप्रसाद अर्याल उम्मेदवारको आकांक्षी रहेका थिए ।

रूपन्देहीको सिद्धार्थनगर–९, अञ्चलपुरमा जन्मिएका डा.थापा वरिष्ठ न्युरोलोजिस्ट हुन् । न्युरोलोजी अध्ययन गरेका डा.थापा अमेरिकाको प्रसिद्ध हार्वर्ड विश्वविद्यालयको ‘सेफ्टी क्वालिटी लिडरसिप एण्ड इन्फमेटिभ’का ग्राजुएट्स हुन् ।