कुरान घटनामा दुई महिला पक्राउ

सेराङ (इन्डोनेसिया), २९ चैत । धार्मिक संवेदनशीलतासँग जोडिएको एक घटनाले इन्डोनेसियामा व्यापक विवाद निम्त्याएको छ । कुरानमाथि पाइला टेकेको भिडियो सामाजिक सञ्जालमा भाइरल भएपछि प्रहरीले दुई महिलालाई ईश्वरनिन्दाको आरोपमा पक्राउ गरेको जनाएको छ ।

प्रहरीका अनुसार नाम र उमेर सार्वजनिक नगरिएका ती महिलालाई बान्टेन प्रान्तबाट यसै हप्ता नियन्त्रणमा लिइएको हो । घटनासँग सम्बन्धित भिडियो तीव्र रूपमा फैलिँदै जनआक्रोश बढेपछि उनीहरूलाई अनुसन्धानका लागि पक्राउ गरिएको बताइएको छ । इन्डोनेसियाको विद्यमान ईश्वरनिन्दा कानूनअनुसार दोषी ठहर भएमा उनीहरूले अधिकतम पाँच वर्षसम्म जेल सजाय भोग्नुपर्ने सम्भावना रहेको छ ।

घटना बुधबार बान्टेनको लेबक क्षेत्रमा घटेको बताइएको छ, जुन राजधानी जकार्ताबाट करिब १४० किलोमिटर टाढा पर्छ । प्रहरी विवरणअनुसार एक सलुन सञ्चालिकाले आफ्ना ग्राहकलाई सामान चोरी गरेको आरोप लगाएकी थिइन् । आरोप अस्वीकार भएपछि उनले ती महिलालाई कुरानमाथि पाइला टेरेर निर्दोष रहेको कसम खान दबाब दिएकी थिइन् र त्यसको भिडियोसमेत खिचिएको थियो ।

बान्टेन प्रहरीका प्रवक्ता मारुली अहिलेस हुतापियाले दुवै महिलाले घटनामा आफ्नो संलग्नता स्वीकार गरेको जानकारी दिए । उहाँका अनुसार कुरानमाथि पाइला टेक्ने महिला र त्यसका लागि दबाब दिने सलुन सञ्चालिका दुवैलाई सोधपुछपछि संदिग्धका रूपमा औपचारिक रूपमा दर्ता गरिएको छ ।

भिडियो सार्वजनिक भएसँगै सामाजिक सञ्जालमा तीव्र प्रतिक्रिया देखिएको छ । धार्मिक आस्थासँग जोडिएको विषय भएकाले धेरैले कडा कारबाहीको माग गरेका छन् । यस्ता घटनाहरूले मुस्लिम बहुल जनसङ्ख्या रहेको इन्डोनेसियामा संवेदनशील बहस निम्त्याउने गरेको छ ।

मानवअधिकार समूहहरूले भने लामो समयदेखि ईश्वरनिन्दा कानूनको आलोचना गर्दै आएका छन् । उनीहरूका अनुसार यस्तो कानून बारम्बार धार्मिक अल्पसङ्ख्यक वा विवादास्पद अभिव्यक्तिलाई लक्षित गर्न दुरुपयोग हुने गरेको छ ।

यसअघि पनि यस्ता घटनामा कारबाही भएका उदाहरण छन् । अहोकका नामले समेत चिनिने जकार्ताका पूर्वगभर्नर बासुकी तजाहाजा पूर्णमाले सन् २०१७ मा ईश्वरनिन्दाको आरोपमा करिब दुई वर्ष जेल सजाय भोगेका थिए । त्यस्तै, सन् २०२४ मा एक स्ट्यान्ड–अप कमेडियनलाई धार्मिक व्यक्तित्वबारे मजाक गरेको अभियोगमा छ महिनाको जेल सजाय सुनाइएको थियो ।

विश्वकै सबैभन्दा ठूलो मुस्लिम जनसङ्ख्या भएको इन्डोनेसियामा २४ करोडभन्दा बढी मुस्लिम बसोबास गर्छन् । यस्तो सन्दर्भमा धार्मिक विषयसँग सम्बन्धित घटनाहरूले सामाजिक तथा कानूनी दुवै तहमा ठूलो प्रभाव पार्ने गरेको देखिन्छ । रासस