काठमाडौं । राष्ट्रपति रामचन्द्र पौडेलले नेपाली जनताले सुशासनमार्फत प्रभावकारी सेवा प्रवाह, मुलुकको तीव्र विकास, शान्ति र प्रगति चाहेको बताएका छन् ।
सोमवार लोकसेवा आयोगको स्थापना दिवसका अवसरमा आयोजित कार्यक्रममा सम्बोधन गर्दै उनले यस्तो बताएका हुन् ।
राष्ट्रपति पौडेलले लोकसेवा आयोगको साढे सात दशक लामो इतिहासमा कायम रहेको निष्पक्षता, योग्यता र स्वच्छताको सिद्धान्तलाई अझ सुदृढ बनाउनुपर्नेमा जोड दिए ।
आयोगप्रतिको अटुट जनविश्वास नै यसको सबैभन्दा ठूलो सम्पत्ति भएको उल्लेख गर्दै उनले संघीय लोकतान्त्रिक गणतन्त्रको मुख्य लक्ष्य पनि सुशासन, प्रभावकारी सेवा प्रवाह र तीव्र विकास भएको बताए ।
उनका अनुसार जनताको आकांक्षा पूरा गर्न राज्य संयन्त्रलाई समयअनुकूल, जनमुखी, प्रविधिमैत्री र परिणाममुखी बनाउन आवश्यक छ ।
‘संघीय लोकतान्त्रिक गणतन्त्रका लागि संघर्ष र बलिदान गरेका नेपाली जनताले चाहेको भनेकै सुशासनमार्फत प्रभावकारी सेवा प्रवाह, मुलुकको तीव्र विकास, शान्ति र प्रगति नै हो,’ उनले भने, ‘यो उद्देश्य पूरा गर्न राज्य संयन्त्रलाई समयअनुकूल जनमुखी, सेवामुखी, प्रविधिमैत्री र परिणाममुखी बनाउन जरुरी छ ।’
राष्ट्रपति पौडेलले आयोगलाई आधुनिक प्रविधिको प्रयोग बढाउन र समयसापेक्ष परीक्षण विधि अपनाउन सुझाव दिए ।
प्रतिक्रिया