भारतसँग सहकार्य विस्तारमा जापानको जोड

नयाँदिल्ली, १८ असार । जापानकी प्रधानमन्त्री साने ताकाइचीले भारतको तीनदिने औपचारिक भ्रमणका क्रममा द्विपक्षीय रणनीतिक साझेदारी, आर्थिक सुरक्षा, लगानी र नवप्रवर्तनमा सहकार्यलाई नयाँ उचाइमा पुर्‍याउने प्रतिबद्धता व्यक्त गरेकी छिन् । नयाँदिल्ली आइपुगेलगत्तै उनले भारतले गरेको न्यानो स्वागतप्रति आभार व्यक्त गर्दै भ्रमणप्रति उत्साहित रहेको बताइन् ।

जापानी क्याबिनेटको जनसम्पर्क कार्यालयले सामाजिक सञ्जाल एक्समार्फत भारतको स्वागतप्रति धन्यवाद दिँदै भारत भ्रमण गर्न पाउँदा निकै उत्साहित रहेको जनाएको छ । यसअघि केन्द्रीय विज्ञान तथा प्रविधि राज्यमन्त्री जितेन्द्र सिंहले पालम प्राविधिक विमानस्थलमा ताकाइचीलाई स्वागत गरेका थिए । उनका अनुसार भ्रमणका क्रममा हुने १५औँ भारत–जापान वार्षिक शिखर सम्मेलनले दुई देशबीचको बढ्दो रणनीतिक साझेदारीलाई थप सुदृढ बनाउने अपेक्षा गरिएको छ ।

भारतीय प्रधानमन्त्री नरेन्द्र मोदीले पनि ताकाइचीलाई स्वागत गर्दै उनको पहिलो भारत भ्रमणले द्विपक्षीय सम्बन्धलाई अझ गहिरो बनाउने विश्वास व्यक्त गरेका छन्। प्रधानमन्त्री मोदीले दुवै नेताबीच द्विपक्षीय तथा क्षेत्रीय विषयमा विस्तृत छलफल हुने र संयुक्त प्रयासमार्फत इन्डो–प्यासिफिक क्षेत्रसहित विश्वमा शान्ति, स्थिरता र समृद्धि प्रवर्द्धन गर्ने लक्ष्य रहेको उल्लेख गरे ।

ताकाइचीले अन्तर्राष्ट्रिय परिस्थितिमा बढ्दो अनिश्चितताबीच समान मूल्य र रणनीतिक हित साझा गर्ने भारतसँगको सहकार्य अझ महत्त्वपूर्ण बन्दै गएको बताइन् । उनले प्रधानमन्त्री मोदीसँगको भेटवार्तामा जापान–भारत रणनीतिक साझेदारीलाई थप गहिरो बनाउने, आर्थिक सुरक्षामा सहकार्य विस्तार गर्ने तथा दुवै देशका कम्पनीबीच लगानी र नवप्रवर्तनमा सहकार्य बढाउने विषयमा ठोस प्रगति गर्ने अपेक्षा व्यक्त गरिन् ।

उनले सरकारी तथा निजी क्षेत्रबीचको साझेदारीलाई बलियो बनाउँदै जापान–भारत सहकार्यको दायरा अझ विस्तार गर्ने लक्ष्य रहेको पनि बताइन् ।

प्रधानमन्त्री मोदीको निमन्त्रणामा ताकाइची जुलाई १ देखि ३ सम्मको तीनदिने औपचारिक भ्रमणका लागि भारत आएकी हुन् । रासस