काठमाडौं । सुनसरी जिल्लाको देवानगञ्ज गाउँपालिका–३, कप्तानगञ्जमा भएको हिंसात्मक घटनाको सन्दर्भमा राष्ट्रिय एकता दलका अध्यक्ष विनय यादवले माइतीघर मण्डलामा जारी राखेको आमरण अनशन आज नवौं दिनमा प्रवेश गरेको छ। अनशन लम्बिँदै गएसँगै यस विषयले राजनीतिक वृत्तमा समेत चर्चा पाउन थालेको छ।
शुक्रबार राष्ट्रिय प्रजातन्त्र पार्टी (राप्रपा) की सांसद खुश्बु ओलीले प्रतिनिधिसभामा आमरण अनशनको विषय उठाउँदै सरकारलाई आन्दोलनरत पक्षका मागप्रति गम्भीर बन्न र तत्काल संवादमार्फत समाधान खोज्न आग्रह गरेकी छन्।
यसैबीच, आमरण अनशनस्थलमा राष्ट्रिय मधेशी आयोगका अध्यक्ष विनय दत्त पनि पुगेका थिए। अनशनरत विनय यादवसँग भेटघाटपछि सञ्चारकर्मीसँग कुरा गर्दै उनले आन्दोलनरत पक्षले उठाएका विषयहरूलाई सरकारले गम्भीर रूपमा लिनुपर्ने बताए। उनले सुनसरी घटनाको निष्पक्ष छानबिन, दोषीमाथि कानुनी कारबाही तथा पीडित परिवारलाई न्याय दिलाउन आवश्यक रहेको धारणा व्यक्त गरे।
दत्तले आफ्नो धारणा राख्ने क्रममा नेपालमा अवैध आर्थिक गतिविधि, अवैध आप्रवासन तथा सीमापारबाट हुने गैरकानुनी गतिविधिहरू राष्ट्रिय सुरक्षाका लागि चुनौती बन्न सक्ने दाबी गरे। साथै, उनले केही हिन्दू समुदायका व्यक्तिहरूमाथि भएका हिंसात्मक घटनाप्रति पनि चिन्ता व्यक्त गरे। यी विषयमा उनका भनाइहरू उनको व्यक्तिगत तथा संस्थागत धारणा भएको उल्लेख गर्दै उनले सरकारले तथ्यमा आधारित अनुसन्धान र प्रभावकारी सुरक्षा नीति अवलम्बन गर्नुपर्ने बताए।
उनले नेपाललाई पुनः हिन्दू राष्ट्र घोषणा गर्नुपर्ने विषयमा पनि आफ्नो राजनीतिक धारणा राख्दै, हिन्दू राष्ट्रको संवैधानिक व्यवस्था हटाइएपछि यस्ता प्रकृतिका घटनाहरू बढेको आफ्नो विश्वास रहेको बताए। यस विषयमा व्यापक राष्ट्रिय बहस र संवैधानिक प्रक्रियामार्फत निर्णय हुनुपर्ने उनको भनाइ थियो।
राष्ट्रिय एकता दलले जारी आमरण अनशनमार्फत सुनसरी घटनाको निष्पक्ष छानबिन, दोषीमाथि कानुनी कारबाही, पीडित परिवारलाई न्याय तथा आफूहरूले अघि सारेका विभिन्न नीतिगत मागहरू सम्बोधन गर्न सरकारसँग आग्रह गर्दै आएको छ। दलका अनुसार सरकारले हालसम्म आन्दोलनरत पक्षसँग सार्थक वार्ता नगरेकाले अनशन जारी राखिएको हो।
अनशनस्थलमा विभिन्न राजनीतिक दलका नेता, सामाजिक अभियन्ता, धार्मिक व्यक्तित्व तथा सर्वसाधारणको उपस्थिति निरन्तर बढिरहेको राष्ट्रिय एकता दलले जनाएको छ। उनीहरूले सरकारलाई अनशनरत पक्षसँग तत्काल संवाद गरी सहमतिमार्फत समस्या समाधान गर्न आग्रह गरिरहेका छन्।
याे समाचार तयार पार्दासम्म आमरण अनशन नवौं दिन पनि माइतीघर मण्डलामा जारी छ । सरकारका तर्फबाट आन्दोलनका पछिल्ला मागबारे कुनै औपचारिक प्रतिक्रिया सार्वजनिक भएको छैन।
प्रतिक्रिया