देउवालाई स्वागत गर्न शीर्ष नेताहरू विमानस्थल पुगे

काठमाडौं । नेपाली कांग्रेसका पूर्वसभापति शेरबहादुर देउवा केहीबेरमा त्रिभुवन अन्तर्राष्ट्रिय विमानस्थलमा उत्रिँदै छन् । यतिबोला देउवालाई स्वागत गर्न इतर पक्षका शीर्ष नेताहरू त्रिभुवन अन्तर्राष्ट्रिय विमानस्थल पुगेका छन् ।

करिब साढे ५ महिनापछि स्वेदश फर्किएका देउवालाई राष्ट्रिय भेला आयोजक समितिका संयोजक डा. शशांक कोइरालाको नेतृत्वमा स्वागत गर्ने तयारी छ । अहिलेसम्म पूर्णबहादुर खड्का, प्रकाशशरण महत, एनपी साउद, विमलेन्द्र निधी, कृष्णप्रसाद सिटौला, ज्ञानेन्द्र कार्की, मीन विश्वकर्मा, मोहनबहादुर बस्नेत, उमाकान्त चौधरीलगायत शीर्ष नेता एयरपोर्टमा पुगिसकेका छन् ।

अन्य शीर्ष नेता कार्यकर्ता जाँदै छन् । देउवाको स्वागतमा करिब ५ देखि ७ हजार नेता कार्यकर्ता उपस्थित हुने इतर पक्षको दाबी छ ।

देउवालाई विमानस्थल प्रवेश गर्ने गोल्डेन गेटको अगाडि खाली ठाउँ, नमस्ते गेटको अगाडिको खाली ठाउँ र तिलगंगा आँखा अस्पताल अगाडिको खाली ठाउँमा भेला भएर बाजागाजा र झाँकीसहित स्वागत गर्ने तयारी छ ।

त्रिभुवन विमानस्थलबाहिरको सुरक्षा व्यवस्था पनि कडा पारिएको छ ।