काठमाडौँ। नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवाले पार्टीभित्र छाएको निराशा र असहमति चिर्दै एकताबद्ध हुन आह्वान गरेका छन्। साढे पाँच महिनाको विदेश बसाइपछि स्वदेश फर्किएका नेता देउवाले आफू शक्ति प्राप्तिका लागि नभई राष्ट्रिय एकता सुदृढ बनाउन सक्रिय हुन फर्किएको स्पष्ट पारेका छन्।
पार्टीभित्रको आन्तरिक विवादले राष्ट्रियता नै कमजोर हुन सक्ने खतरा औंल्याउँदै देउवाले भने, “म नेता बनेर होइन, यस महान् राष्ट्रको आजीवन नागरिक बनेर फर्किएको छु।”
मेलमिलापको सन्देश: वि.सं. २०३३ सालमा बीपी कोइरालाले लिएको राष्ट्रिय एकता तथा मेलमिलापको नीतिको स्मरण गराउँदै देउवाले वर्तमान परिस्थितिमा पनि सर्वपक्षीय राष्ट्रिय एकता अपरिहार्य रहेको बताए।
अहंकार त्याग्न अपिल: कांग्रेस कुनै व्यक्तिको ‘इगो’ (अहंकार) का आधारमा नभई जनताको सर्वोपरि हितलाई केन्द्रमा राखेर चल्नुपर्ने उनको भनाइ छ।
सहकार्यमा जोड: कांग्रेस एकताबद्ध भई मुलुकका अन्य राजनीतिक दलहरूसँग समेत सहमति र सहकार्यका साथ अघि बढ्नुपर्ने आवश्यकता देउवाले औंल्याएका छन्।
सामूहिक भावना: पार्टी सामूहिकतामा विश्वास गर्ने संस्था भएकाले सबै नेता, कार्यकर्ता र समर्थकहरूलाई त्याग, बलिदान र संघर्षलाई आत्मसात् गर्दै अघि बढ्न उनले अपिल गरे।
देउवाले राष्ट्र, राष्ट्रियता, लोकतन्त्र र विधिको शासनप्रति आफ्नो अटुट प्रतिबद्धता दोहोर्याउँदै मुलुकको बृहत्तर हितका लागि सम्पूर्ण राजनीतिक शक्तिहरू एक ठाउँमा उभिनुपर्नेमा जोड दिएका छन्।
प्रतिक्रिया