जनताको सेवामा चनखु वडा : सामाजिक सुरक्षा भत्ता नवीकरण काठमाडौंमै

काठमाडौं । रामेछाप मन्थली नगरपालिका–१० चनखु वडा कार्यालयले सामाजिक सुरक्षा भत्ता नवीकरणका लागि काठमाडौंमै सेवा प्रदान गरेको छ । चनखु स्थायी घर भई हाल काठमाडौंमा बसोबास गर्दै आएका सामाजिक सुरक्षा भत्ता लाभग्राहीलाई लक्षित गर्दै जडिबुटीस्थित आभार होटलमा नवीकरण सेवा सञ्चालन गरिएको हो ।

‘जनताको सेवामा चनखु वडा´ भन्ने भावनासहित वडा अध्यक्ष गोपीलाल तामाङ र वडाका कर्मचारी स्वयं काठमाडौं आएर सेवाग्राहीलाई सेवा दिएका हुन् ।

गाउँमै पुगेर सेवा लिनुपर्ने अवस्थालाई सहज बनाउँदै वडा कार्यालयले काठमाडौंमा रहेका आफ्ना नागरिकलाई लक्षित गरी सेवा सञ्चालन गरेको वडाअध्यक्ष तामाङले जानकारी दिए ।

हालसम्म चनखुका १८ जनाको सामाजिक सुरक्षा भत्ता कार्ड नवीकरण सम्पन्न भएको छ । चनखुका अतिरिक्त अन्य वडाका नागरिकले समेत उक्त सेवाबाट लाभ लिएको वडाअध्यक्ष गोपीलालले बताए ।

वडाअध्यक्ष गोपीलालका अनुसार एकै दिनमा विभिन्न वडाका गरी करिब ४० जनाको नवीकरण सम्पन्न भएको छ । बाँकी रहेका सेवाग्राहीका लागि भोलि पनि नवीकरण सेवा सञ्चालन हुने वडा अध्यक्ष तामाङले जानकारी दिए ।

काठमाडौंमा रहेका सामाजिक सुरक्षा भत्ता लाभग्राहीलाई आवश्यक कागजातसहित उपस्थित भई सेवा लिन उनले आग्रहसमेत गरेको छ ।

स्थानीय तहको सेवा नागरिकको घरदैलोमै पुर्‍याउने उद्देश्यअनुसार काठमाडौंमै आएर सेवा सञ्चालन गरिएको वडा कार्यालयले जनाएको छ ।