पोखरा, ३ भदौ । गण्डकी प्रदेश सरकारले गत आर्थिक वर्ष २०८२/८३ मा आन्तरिक राजस्व सङ्कलनतर्फ निर्धारित लक्ष्यको ७२ दशमलव ८७ प्रतिशत मात्रै प्रगति हासिल गरेको छ ।
गण्डकी प्रदेश नीति तथा योजना आयोगका उपाध्यक्ष डा कृष्णचन्द्र देवकोटाका अनुसार गत आर्थिक वर्षमा रु चार अर्ब १७ करोड ८८ लाख ११ हजार राजस्व सङ्कलन गरेको छ । प्रदेश सरकारले रु पाँच अर्ब ७३ करोड ४३ लाख ८८ हजार आन्तरिक राजस्व सङ्कलन गर्ने लक्ष्य राखेको थियो ।
सबैभन्दा बढी सवारीसाधन करतर्फ रु एक अर्ब २० करोड ६९ लाख १६ हजार अर्थात् लक्ष्यको ८७ दशमलव ४६ प्रतिशत राजस्व सङ्कलन भएको छ । यस शीर्षकमा रु एक अर्ब ३८ करोडको लक्ष्य राखिएको थियो । यस्तै, घरजग्गा रजिस्ट्रेसनबाट रु ९१ करोड ३७ लाख ३४ हजार राजस्व सङ्कलन भएको छ ।
यस्तै, विज्ञापन कर सङ्कलन उत्साहजनक देखिएको छ । रु २२ लाख ७८ हजार लक्ष्य राखिएको यस शीर्षकमा रु ३२ लाख दुई हजार सङ्कलन भएको छ ।
कृषि आयमा लाग्ने करमा भने लक्ष्यको २१ दशमलव ४८ प्रतिशत मात्र राजस्व सङ्कलन भएको छ । रु २० लाख लक्ष्य राखिएकामा रु चार लाख ९५ हजार मात्रै सङ्कलन भएको छ । पर्यटन तथा पदयात्रा शुल्कबाट रु १४ लाख ६९ हजार अर्थात् लक्ष्यको २४ दशमलव ६९ प्रतिशत मात्रै प्राप्त भएको छ ।
ढुङ्गा, गिट्टी, बालुवालगायत नदीजन्य पदार्थको बिक्रीबाट रु. १९ करोड ७२ लाख ३४ हजार, मनोरञ्जन करतर्फ रु ३४ लाख ४५ हजार र यातायात क्षेत्रको अन्य आम्दानीबाट रु ५५ करोड ४० लाख ५३ हजार राजस्व सङ्कलन भएको छ ।
केही क्षेत्रको राजस्व सङ्कलन कमजोर रहे पनि प्रमुख शीर्षकमा भएको उल्लेख्य वृद्धिका कारण प्रदेशको समग्र आन्तरिक राजस्व सङ्कलन सन्तोषजनक रहेको उपाध्यक्ष डा देवकोटाले जानकारी दिए ।
प्रतिक्रिया