काठमाडौँ । तिब्बत क्षेत्रमा भूकम्पका कारण हिमपहिरो गएर आएको भीषण बाढी र त्यसपछिको परिस्थिति तथा उद्धार प्रयासबारे परराष्ट्रमन्त्री शिशिर खनालले प्रतिनिधिसभालाई जानकारी गराएका छन्। बाढीको मुख्य कारण भूकम्पपछि गएको हिमपहिरो नै भएको अनुमान गरिए पनि यसलाई थप पुष्टि गर्न बाँकी रहेको उनले बताए। सरकारको सम्पूर्ण ध्यान हाल प्रभावित क्षेत्रमा केन्द्रित रहेको मन्त्री खनालको भनाइ छ।
मन्त्रिपरिषद्का मुख्य निर्णय तथा उद्धार प्रयास
सदनलाई जानकारी दिँदै मन्त्री खनालले उद्धार तथा राहत कार्यका लागि मन्त्रिपरिषद् बैठकले गरेका मुख्य निर्णयहरू प्रस्तुत गरे:
- स्वास्थ्य उपचार र राहत: घटनामा घाइते भएकाहरूको शीघ्र स्वास्थ्यलाभको कामना गर्दै सम्पूर्ण घाइतेको निःशुल्क उपचार गर्ने र मृतकका परिवारलाई आर्थिक सहायता उपलब्ध गराउने निर्णय भएको छ।
- हेलिकप्टर परिचालन र स्थानान्तरण: खोज, उद्धार र विचल्लीमा परेका नागरिकलाई सुरक्षित स्थानमा पुर्याउन नेपाली सेना र निजी क्षेत्रका गरी कुल १३ वटा हेलिकप्टर परिचालन गरिएको छ।
- गाँस र बासको व्यवस्था: घरबार गुमाएका नागरिकहरूलाई सुरक्षित स्थानमा स्थानान्तरण गरी उनीहरूका लागि तत्काल खाने र बस्ने पूर्ण व्यवस्था मिलाइनेछ।
- पूर्वाधार पुनः सञ्चालन: बाढीका कारण क्षतविक्षत भएका सडक सञ्जाल, खानेपानी, विद्युत् र दूरसञ्चार सेवाहरू द्रुत गतिमा पुनः सञ्चालन गरिनेछ।
- संकटग्रस्त क्षेत्र घोषणा: विपद्बाट अति प्रभावित भएका जिल्लाहरूलाई औपचारिक रूपमा ‘संकटग्रस्त क्षेत्र’ घोषणा गर्ने निर्णय सरकारले गरेको छ।
क्षतिको अवस्था र अन्तर्राष्ट्रिय सहयोग
सम्बोधनका क्रममा मन्त्री खनालले प्रभावित क्षेत्रमा हालसम्म ९ जनाको मृत्यु भएको जानकारी आएको र उनीहरूको सनाखत हुन बाँकी रहेको बताए।
सीमापारि चिनियाँ भू-भागमा पनि ठूलो विपत्ति देखिएको उल्लेख गर्दै उनले मित्रराष्ट्रहरूले राहत तथा उद्धारमा सहयोग गर्ने प्रतिबद्धता जनाएको जानकारी दिए। आवश्यकताअनुसार सरकारले वैदेशिक सहयोग स्वीकार गरी थप राहत कार्य अगाडि बढाउनेछ।
प्रतिक्रिया