१८ घण्टाको जोखिमपूर्ण यात्रा पार गर्दै चिलिमेसम्म पुगेर खाद्यान्न र सोलार वितरण; धादिङ र नुवाकोटपछि रसुवाका दुर्गम बस्तीमा मलम लगाउने प्रयास
रसुवा — भोटेकोशी र त्रिशूली नदीको बाढीले रसुवामा पारेको जनधनको भीषण क्षतिपछि पीडितको घाउमा मलम लगाउन समाजसेवी भागीरथा विष्ट (सुधा कुमार) राहत सामग्री बोकेर प्रभावित बस्तीमै पुगेकी छन् । मुसलधारे वर्षा र पहिराका कारण सडक सञ्जाल क्षतविक्षत बनेको अवस्थामा त्रिशूलीबाट १८ देखि २० घण्टाको जोखिमपूर्ण यात्रा पार गर्दै उनी रसुवाको चिलिमे क्षेत्रसम्म पुगेकी हुन् ।
बाढीपहिरोले रसुवाका धेरैजसो बस्तीमा कहालीलाग्दो क्षति पुर्याएको छ । “रसुवामा घरैपिच्छे मृतकको काजक्रिया भइरहेको छ, ९० प्रतिशत मानिसहरू विस्थापित र बिजोग अवस्थामा छन्,” विष्टले भनिन्, “एउटै घरका सात-आठ जनासम्म हराएका छन् । मुख्य समस्या केरुङ नाकामा काम गर्न गएका परिवारका पुरुषहरू गुमेपछि अहिले बस्तीमा वृद्धावृद्धा, महिला र बालबालिका मात्रै सहाराविहीन अवस्थामा छन् ।”
राज्यका औपचारिक संयन्त्रहरू अझै पुग्न नसकेको ती दुर्गम बस्तीहरूमा स्थानीयको मागअनुसार उनले एक-एक बोरा चामल, नुनका साथै बिजुली र टेलिफोन सम्पर्कविच्छेद भएका स्थानका लागि सोलार लाइट र मोबाइल चार्जिङ सेट वितरण गरेकी छन् ।
सडकको दुरावस्थाका कारण सबै राहत सामग्री एकैपटक रसुवा लैजाने अवस्था नभएपछि विष्टले नुवाकोटको त्रिशूलीमा ‘होल्डिङ सेन्टर’ मा तरकारी र अन्य राहत सामग्री भण्डारण गर्न दिएर आफू रसुवातिर लागेकी थिइन् ।
“सडक गतिलो नभएकाले छामेर बामे सर्दै त्रिशूलीबाट हिँडेका थियौँ । राम्चेमा पुगेर एक-डेढ घण्टा फ्रेस भएपछि चिलिमे हाइड्रोपावर क्षेत्रसम्म पुगेर घरैपिच्छे राहत बाँड्यौँ,” उनले भनिन् । हाल प्रभावित क्षेत्रका होटल तथा घरहरूमा खाना पकाउने ग्यासको समेत चरम अभाव रहेको उनले जानकारी दिइन् । ग्यास सिलिन्डरको माग भए तापनि सडकको दुरावस्थाका कारण आफूले लैजान सक्ने अवस्था नरहेको समाजसेवी विष्टले प्रस्ट पारिन् ।
रसुवा पुग्नुअघि विष्टले बाढीबाट प्रभावित धादिङका गल्छी, गजुरी गाउँपालिका र बेल्खु क्षेत्रमा पुगेर झन्डै ४०० परिवारलाई खाद्यान्न तथा अत्यावश्यक राहत सामग्री वितरण गरिसकेकी छन् । काठमाडौँबाट नजिकै भएर पनि गल्छीका बासिन्दाले पिउने पानी नपाएको, एक तला घरसम्म लेदो पुरिएको र सञ्चार सम्पर्कविच्छेद भएको दृश्यले आफूलाई स्तब्ध बनाएको उनले बताइन् ।
भर्खरै थाइल्यान्डको बैंककमा आयोजित ‘ग्लोबल एसिया नेपाल एक्सेलेन्ट अवार्ड २०२६’ मा प्रतिष्ठित ‘पावर अफ वुमेन अवार्ड २०२६’ बाट सम्मानित भएकी विष्ट व्यक्तिगत खुसी र उत्सव मनाउन छाडेर सिधै बाढीपीडितको आँसु पुछ्न फिल्डमा खटिएकी हुन् ।
प्रतिक्रिया