संसदीय विशेष समितिको सभापति चयन असोज १४ गते हुने

काठमाडौं । हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्का विषयमा अध्ययन गर्न गठित संसदीय विशेष समितिको सभापति चयन गर्ने मिति तय भएको छ ।

आज प्रतिनिधि सभाको बैठकमा सभामुख डोलप्रसाद अर्यालले असोज १४ गते समितिको सभापति चयनका लागि निर्वाचन हुने जानकारी गराए ।

प्रतिनिधि सभा नियमावली, २०८३ को नियम १७६ को उपनियम १ बमोजिम असोज १४ गते दिउँसो २ बजे सभापति चयनका लागि निर्वाचन हुने उनले बताए ।

जलवायु परिवर्तनका कारण हिमाली क्षेत्रमा परेको असर तथा भोटेकोशी र त्रिशूली नदी किनारका बस्तीमा बढ्दै गएको विपद्को जोखिम अध्ययन गर्न समिति गठन गरिएको हो ।

जलवायु न्यायका विषयमा नेपालले अन्तर्राष्ट्रिय मञ्चमा आवाज उठाउँदै आएका बेला संसदीय समितिबाट हुने अध्ययन, अनुसन्धान र सुझावलाई महत्वपूर्ण रूपमा हेरिएको छ ।