विदेशी ज्ञान र अनुभव स्वदेशमा : ‘क्याटरिङ’ व्यवसायमा अब्बल जनप्रकाश चापागाईँ

चितवन, १३ असोज । राजनीतिक दलका महाधिवेशन, विभिन्न संघ सस्थाका साधारणसभाजस्ता कार्यक्रममा भोजनको व्यवस्था गर्नुपर्ने काम अत्यन्त चुनौती मानिन्छ ।

यही चुनौतीलाई अगाल्ने मध्येका एक व्यक्ति जनप्रकाश चापागाई हुन् । पछिल्ला समय दुई ठूला राजनीतिक दलका चार राष्ट्रिय कार्यक्रममा भोजनको जिम्मेवारी सम्हालेपछि उनी भोजन व्यवस्थापनका लागि अब्बल बनेका छन् ।

बेलायतबाट सेवा क्षेत्रमा अनुभव हासिल गरेर स्वदेश फर्किएपछि उनले काठमाडौँ, बुटवल र भरतपुरमा होटल र पार्टी प्यालेस सञ्चालन गर्न सुरुआत गरे काठमाडौँमा अनुपम फुडल्याण्ड, दियालो फुडल्याण्ड, गोधुली रेष्टुरेण्टका सञ्चालक चापागाईसहितको समूह छ ।

उनले नेपाली कांग्रेसका दुई महाधिवेशन, एक महासमिति बैठक र यसै वर्ष चितवनमा राष्ट्रिय स्वतन्त्र पार्टीको महाधिवेशनमा सहभागी नेता कार्यकर्तालाई भोजनको व्यवस्थापन गरेका छन्।

चितवनको शिवनगरमा २०२४ सालमा जन्मिएका उद्योगी चापागाई चितवनको बालकुमारी क्याम्पसमा उच्च शिक्षा हासिल गरी काठमाडौँ पुगे । काठमाडौँमा रहेर चार वर्ष सरकारी सेवामा काम गरेपछि उनी २०५३ सालमा बेलायत पुगे ।

बेलायतमा रहँदा उनी क्याटरिङ तथा होटल व्यवसायमा संलग्न भए । त्यहाँको कामका क्रममा भोजन व्यवस्थापन, धेरै सङ्ख्यामा ग्राहकलाई सेवा दिने प्रणाली र क्याटरिङ व्यवसायका विभिन्न पक्षबारे अनुभव हासिल गरेको उनले सुनाए ।

करिब नौ वर्ष बेलायत बसेपछि २०६२ सालतिर नेपाल फर्किएका उनी यहाँ आएपछि व्यवसायमा निरन्तर जारी छ । सुरुमा अस्पताल र घरजग्गामा लगानी गरेका उनले आफूले जानेको सीपलाई उपयोग गर्दै बिदेशबाट फर्किएका पाँच साथीलाई साथमा लिएर पार्टीप्यालेस सञ्चालन गरे । उनले भने “काठमाडौँमा पहिलो दियालो फुडल्याण्ड, यसपछि अनुपम फुडल्याण्ड सञ्चालनमा ल्याए ।”

यी दुवैमा राम्रो सफलता पाएपछि उनले बुटवलमा दुई र भरतपुरमा एउटा दियालो फुडल्याण्ड सञ्चालन गरेका छन् । काठमाडौँको बालाजुमा अर्काे दियालो फुडल्याण्ड र सामाखुशीमा उनकै समूहको गोधुली फुडल्याण्ड सञ्चालनमा छ ।

फरक फरक ठाउँमा स्थानीयसमेतलाई ३० प्रतिशत साझेदार बनाएर उनले व्यवसाय विस्तार गरेका हुन् । यससँगै उनले आफ्नो अनुभवलाई ठूला कार्यक्रममा केन्द्रित गरेका छन् । एउटै कार्यक्रममा एक छाकमा पाँच हजारलाई खाना खुवाइसकेका चापागाई १० हजार जनासम्मलाई भोजनको व्यवस्थापन सकिने बताउँछन् ।

आफूले अनुपम फुडल्याण्डमा दैनिक तीन हजार पाँच सयसम्मलाई भोजनको व्यवस्थापन गर्न सकिने जनाउँदै उनले आफ्नै अन्य पार्टी प्यालेसका सामग्री र जनशक्ति प्रयोग गरेर सहजै भोजन खुवाउन सकिने बताए ।

उनका अनुसार १० हजार जनाका लागि भोजनको व्यवस्थापन गर्न असाधारण किसिमको पूर्वाधार आवश्यक पर्दैन । भान्सा व्यवस्थापनलाई विस्तार गर्दै जनशक्ति, खाद्य सामग्री र भाँडाकुँडाको पर्याप्त व्यवस्था गर्न सकिएमा ठूलो सङ्ख्यामा भोजन व्यवस्थापन सकिने उनको भनाइ छ ।

उनका अनुसार कार्यक्रममा अपेक्षा गरिएको भन्दा धेरै मानिस सहभागी हुँदा भोजन व्यवस्थापनमा सबैभन्दा बढी दबाब पर्ने अनुभव छ ।

उनले भने, “ मानिस बढेपछि समस्या हुन्छ । एकीन मानिस आउँछन् भनेर तयारी गरिएको हुन्छ, तर त्यसमा थप मानिस आएपछि समस्या हुन्छ ।” उनले आफ्नो अनुभव सुनाए, “छिटो ट्याकल गरेर समाधान गर्नुपर्छ । त्यसका लागि हामीले ब्याकअपको तयारी गरेका हुन्छौँ ।” रासस