काठमाडौँ। भोटेकोशी नदी बाढी प्रभावितको राहत तथा पुनःस्थापना सहयोगार्थ नेपाल ललितकला प्रज्ञा–प्रतिष्ठानमा मंगलबारदेखि ‘मानवताका लागि कला’ प्रदर्शनी सुरु भएको छ ।
भोटेकोशी नदीमा आएको विनाशकारी बाढी तथा त्यसबाट सीर्जित प्राकृतिक विपद्का कारण प्रभावित परिवार तथा समुदायलाई आवश्यक राहत, सहयोग र दीर्घकालीन पुनःस्थापनाका लागि प्रधानमन्त्री दैवी प्रकोप उद्धार कोषमा सहयोग सङ्कलन गर्ने उद्देश्यले प्रदर्शनी आयोजना गरिएको हो।
प्रतिष्ठानका कुलपति एरिणा ताम्राकारका अनुसार मानवीय दायित्व र सामूहिक ऐक्यबद्धताको भावनाको सम्मान गर्दै प्रदर्शनी राखिएको छ। प्रदर्शनीमा कलाकार, कला प्रेमी र सांस्कृतिक संस्थाको सहभागिता छ । कलाकृति बिक्रीबाट उठेको रकममध्ये ७० प्रतिशत रकम प्रधानमन्त्री दैवी प्रकोप उद्धार कोष र १० % रकम कलाकार राहत कोषमा र २० प्रतिशत रकम कलाकारलाई प्रदान गरिने छ ।
प्रदर्शनीमा १६० भन्दा बढी कलाकारका परम्परागत कला, लोककला, चित्रकला, रेखाचित्र, मूर्तिकला, सेरामिक्स, फोटोग्राफी, प्रिन्टमेकिङ, इन्स्टलेसन, मिक्स मिडिया, डिजिटल कला, अन्य दृश्यलगायतका विविध विधाका २०० भन्दा बढी कलाकृतिहरू प्रदर्शितमा छन् । प्रदर्शनी असोज २८ गतेसम्म चल्ने छ। रासस
प्रतिक्रिया