एन्फा अध्यक्ष नेम्वाङ र महासचिव राईलाई पक्राउ गर्न अदालतको आदेश

काठमाडौं । अखिल नेपाल फुटबल संघ (एन्फा) का अध्यक्ष पंकजविक्रम नेम्वाङ र महासचिव किरण राईलाई पक्राउ गर्न ललितपुर जिल्ला अदालतले आदेश दिएको छ।

जिल्ला न्यायाधीश भगवती शर्मा ढुंगानाको इजलासले नेम्वाङ र राईविरुद्ध पक्राउ पुर्जी जारी गर्न आदेश दिएको अदालतका सूचना अधिकारी टिकाध्वज कार्कीले जानकारी दिएका छन्।

यसै मुद्दामा पक्राउ परेका एन्फाका कोषाध्यक्ष रविन्द्र जोशी र लेखा अधिकृत सञ्जीव पाण्डेलाई भने अदालतले धरौटीमा रिहा गर्न आदेश दिएको छ। अदालतको आदेशअनुसार जोशीले १५ लाख रुपैयाँ र पाण्डेले १२ लाख रुपैयाँ धरौटी बुझाउनुपर्नेछ।

नेपाल प्रहरीको केन्द्रीय अनुसन्धान ब्युरो (सीआईबी) ले केही दिनअघि जोशी र पाण्डेलाई पक्राउ गरेको थियो। सीआईबीको अनुसन्धान प्रतिवेदनका आधारमा जिल्ला सरकारी वकिल कार्यालय, ललितपुरले एन्फा अध्यक्ष नेम्वाङ र महासचिव राईसहित चार जनालाई प्रतिवादी बनाउँदै बिहीबार जिल्ला अदालत ललितपुरमा मुद्दा दायर गरेको थियो।

मुद्दा दायर भएपछि अदालतले अध्यक्ष र महासचिवलाई पक्राउ गर्न आदेश दिएको हो भने पक्राउ परेका अन्य दुई प्रतिवादीलाई धरौटीमा छाड्ने निर्णय गरेको हो।