काठमाडौँ। अमेरिकी प्रविधि कम्पनी एनभिडियाका सहसंस्थापक तथा प्रमुख कार्यकारी अधिकृत (सीईओ) जेन्सेन ह्वाङले ३३ वर्षपछि पदबाट राजीनामा दिएका छन्।
कम्पनीको सञ्चालक समितिले बिहीबार उनको राजीनामा स्वीकृत गर्दै प्रमुख वित्तीय अधिकारी (सीएफओ) कोलेट क्रेसलाई अन्तरिम सीईओ नियुक्त गरेको छ
ह्वाङको राजीनामा कम्पनीलाई विवाद र विभिन्न आरोपले घेरिरहेका बेला आएको हो। पछिल्लो समय एक एनभिडिया कार्यकारीसँग ह्वाङको सम्बन्ध रहेको खबर सार्वजनिक भएपछि कम्पनीको सञ्चालक समितिले बुधबार राति आकस्मिक बैठक गरेको थियो।
यसअघि पनि चीनका लागि जासुसी गरेको आशङ्का गरिएकी अर्की महिलासँग ह्वाङको सम्बन्ध रहेको आरोप सार्वजनिक भएको थियो। उक्त विषयमा अनुसन्धान गर्न कम्पनीले कानुनी फर्मसमेत नियुक्त गरेको थियो।
यद्यपि, एनभिडियाले ह्वाङले राजीनामा दिनुको औपचारिक कारण खुलाएको छैन। कम्पनीको विज्ञप्तिमा उनको योगदानको प्रशंसा गरिए पनि ह्वाङको व्यक्तिगत प्रतिक्रिया समावेश गरिएको छैन।
राजीनामाको खबर सार्वजनिक भएपछि एनभिडियाको सेयर मूल्यमा ठुलो गिरावट आएको छ। बिहीबार कारोबार सुरु भएको केही समयमै कम्पनीको सेयर मूल्य १४ प्रतिशतसम्म घटेको थियो। यसले कम्पनीको बजार पुँजीकरणबाट करिब ६ खर्ब अमेरिकी डलर गुमाएको थियो। पछि गिरावट केही कम हुँदै सेयर मूल्य ७.३ प्रतिशतले घटेको अवस्थामा कारोबार भएको थियो।
एनभिडिया कृत्रिम बौद्धिकता (एआई) प्रविधिका लागि आवश्यक चिप उत्पादन गर्ने विश्वकै प्रमुख कम्पनीमध्ये एक हो। पछिल्ला वर्षमा एआई प्रविधिको विस्तारसँगै कम्पनीको मूल्य तीव्र रूपमा बढेको थियो। त्यसैले ह्वाङको बहिर्गमनले कम्पनीको भविष्य र विश्वव्यापी एआई बजारको दिशाबारे लगानीकर्तामा अनिश्चितता बढाएको छ।
यसैबिच, अमेरिकी प्रतिनिधिसभाका सभामुख माइक जोन्सनले ह्वाङको राजीनामालाई ठुलो र आश्चर्यजनक घटनाका रूपमा टिप्पणी गर्दै उनले कम्पनी र देशका लागि उचित निर्णय गरेको बताएका छन्। उनले अमेरिकी अर्थतन्त्र र राष्ट्रिय सुरक्षाका दृष्टिले पनि एनभिडिया महत्त्वपूर्ण कम्पनी भएको उल्लेख गरेका छन्।
प्रतिक्रिया