धादिङमा जिप ४०० मिटर तल खस्याे


४ मंसिर, काठमाडौं । धादिङको रुबीभ्याली गाउँपालिका–४ कलदाङमा जिप दुर्घटना हुँदा एक महिलाको ज्यान गएको छ भने चालकसहित नौ जना घाइते भएका छन् ।

सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार बिहीबार राति १ः५५ बजे लापाबाट बोराङतर्फ जाँदै गरेको जिप उकालो सडकमा अनियन्त्रित भएर करिब ४०० मिटर तल खसेको थियो ।

दुर्घटनामा जिपमा सवार १० जनामध्ये रुबीभ्याली गाउँपालिका–४ की करिब ६६ वर्षीया छेनेन तामाङको घटनास्थलमै मृत्यु भएको थापाले जानकारी दिए ।

दुर्घटनामा चालकसहित अन्य नौ जना घाइते भएका छन् । घाइतेहरूको स्थानीय मेडिकलमा उपचार भइरहेको प्रहरीले जनाएको छ ।

दुर्घटनाको कारण र घाइतेहरूको अवस्थाबारे थप विवरण आउन बाँकी रहेको छ ।