लाइसेन्स छपाइ र वितरणको काम अनिश्चितकालका लागि बन्द

काठमाडौं, २९ भदौ । यातायात व्यवस्था विभागले सवारी चालक अनुमतिपत्र (लाइसेन्स) छपाइ र वितरणको काम अनिश्चितकालका लागि रोकिएको बताएको छ । आज (आइतबार) एक सूचना जारी गर्दै विभागले अर्को सूचना जारी नभएसम्मका लागि सवारी चालक अनुमतिपत्र छपाए तथा वितरण लगायतको सूचना प्रविधिसम्बन्धी सबै प्रणाली बन्द भएको बताएको हो ।

‘सवारी चालक अनुमतिपत्र तथा विद्युतीय सवारी साधन दर्ता सम्बन्धी सेवा अवरुद्ध हुन पुगेको विषम परिस्थितिमा अर्को सूचना नभएसम्मको लागि सवारी चालक अनुमतिपत्र छपाइ तथा वितरण लगायतका सुचना प्रविधिसम्बन्धी सम्पूर्ण प्रणाली बन्द रहने बेहोरा जानकारीका लागि अनुरोध छ,’– विभागले जारी गरेको विज्ञप्तिमा भनिएको छ ।

गत भदौ २४ गते जेन–जी आन्दोलनको क्रममा विभागको संरचनामा तोडफोड, आगजानी तथा चोरी, लुटपाटबाट इलेक्ट्रोनिकउपकरण, छपाइ मेशिन तथा सर्भरमा क्षति पुग्न गएकाले सेवा अवरुद्ध हुन पुगेको बताइएको छ ।