एमाले हाँक्ने कुशल क्याप्टेन ईश्वर पोखरेल हुनुहुन्छ, केपी ओलीको हार निश्चित छः कृष्णगोपाल श्रेष्ठ

काठमाडौं, १ पुस । नेकपा (एमाले) का नेता कृष्णगोपाल श्रेष्ठले पार्टी हाँक्ने कुशल क्याप्टेन ईश्वर पोखरेल रहेको बताएका छन् । आज (मंगलबार) महाधिवेशनस्थलमा सञ्चारकर्मीहरुसँग संक्षिप्त कुराकानी गर्दै उनले यो महाधिवेशनमा केपी शर्मा ओलीको हार र पोखरेल समूहको जित निश्चित रहेको बताएका हुन् । उनले पोखरेललाई एमाले निर्माणको आर्किटेक्टको रुपमा चित्रण गरे । एमालेलाई अहिलेको स्थानसम्म ल्याउनका लागि पोखरेलको भूमिका महत्वपूर्ण रहेको उनको भनाइ छ ।

‘यो ११औं महाधिवेशन एमालेको लागि एउटा महत्वपूर्ण टर्निङ पोइन्ट हो । सही ढंगले यो टर्निङ पोइन्टलाई क्रश गर्नुपर्छ भन्ने आधारमा कुशल क्याप्टेन ईश्वर पोखरेल हुनुहुन्छ । हामी जित्ने प्यानलमा उठेका छौं । गर्वका साथ भन्छौं– हामी जित्छौं,’– उनले भने ।

उनले पार्टी अध्यक्ष ओलीलक्षित गर्दै अहिले आफूहरु पार्टीमा अहंकार, दम्भ र घमण्डी प्रवृत्तिको विरुद्धमा रहेको बताए । एमालेलाई संस्कार युक्त ढंगले आम कार्यकर्ताको प्रतिनिधित्व गर्ने, समग्र जनताको हित, कल्याण र पार्टीलाई बनाउन, देशलाई बचाउन र सिंगो समृद्ध र सुखी नेपाली बनाउने सन्दर्भमा एमाललेमा पुस्तान्तरण र हस्तान्तरण नगरी सुख नै नरहेको उनको भनाइ छ ।