कुलमानको प्रष्टोक्तिः रास्वपाको समानुपातिक सूचीमा मेरा भान्जा र ससुरा छैनन्

काठमाडौं, १६ पुस । ऊर्जा, जलस्रोत तथा सिचाईँमन्त्री कुलमान घिसिङले राष्ट्रिय स्वतन्त्र पार्टी (रास्वपा) को समानुपातिकतर्फको बन्दसूचीमा आफ्नो भान्जा र ससुराको नाम समावेशन नभएको बताएका छन् । कुलमानले समानुपातिक सूचीमा आफ्ना भान्जा र ससुरालाई राखेको भनेर टिकाटिप्पणी सुरु भएपछि उनले यसबारेमा प्रष्ट पारेका हुन् । भान्जा भनेर प्रचार गरिएको व्यक्ति उज्यालो नेपालको तर्फबाट सिफारिस नभएको पनि उनले प्रष्ट पारेका छन् ।

उनले भनेका छन्, ‘प्रतिनिधिसभा निर्वाचन २०८२ का लागि समानुपातिक निर्वाचन प्रणालीतर्फ बुझाइएका केही उम्मेदवारलाई मसँग जोडेर विभिन्न सञ्चारमाध्यम तथा सामाजिक सञ्जालमा फैलाइँदै आएका असत्य, भ्रामक र नियोजित टिकाटिप्पणीप्रति मेरो गम्भीर ध्यानाकर्षण भएको छ। समाचार तथा चर्चामा ‘भान्जा’ भनेर उल्लेख गरिएका व्यक्ति मेरो भान्जा होइनन्, साथै उनी उज्यालो नेपाल पार्टीको तर्फबाट नभई अर्कै टिमबाट सिफारिस भएका व्यक्ति हुन्।’

समानुपातिक उम्मेदवारको सूची कुनै व्यक्ति विशेषको चाहना वा दबाबमा नभएर पार्टीको विधि, मापदण्ड र सामूहिक निर्णय प्रक्रियाबाट तयार गरिएको कुलमानले प्रष्ट पारेका छन् । आफू सार्वजनिक जीवनमा प्रवेश गरेदेखि नै नातावाद, कृपावाद र स्वार्थको राजनीतिविरुद्ध निरन्तर उभिँदै आएको पनि उनले बताएका छन् । उनले आफ्नो इमानदार यात्रालाई कमजोर पार्ने उद्देश्यले तथ्य नबुझी नियोजित हल्ला र आरोपहरू फैलाइएको दाबी गरेका छन् ।

‘राजनीतिमा असहमति हुन सक्छ, तर झूट र भ्रम फैलाएर कसैको बदनाम गराउने प्रयास आपत्तिजनक छ। साथै, बन्दसूचीमा देखिएका प्राविधिक त्रुटिहरू निर्वाचन आयोगले तोकेको समयावधिभित्र सच्याइने प्रतिबद्धतासमेत व्यक्त गर्दछु। म आज पनि पारदर्शिता, इमानदारी र जनताप्रतिको जवाफदेहितामा दृढ छु । त्यसैले यस्ता भ्रामक समाचार र टिकाटिप्पणीको भ्रममा नपर्न सबैमा अनुरोध गर्दछु,’– उनले भनेका छन् ।