राजधानीमा लोकतन्त्र संवाद कार्यक्रम सम्पन्न

काठमाडौं माघ २५ । लोकतन्त्र संवाद अभियानद्वारा आयोजित वृहद् लोकतन्त्र संवाद कार्यक्रम राजधानीमा सम्पन्न भएको छ । लोकतन्त्र, संस्कृति र संवृद्धिलाई मूल मन्त्र बनाएको अभियानले शनिवार राजधानीको राष्ट्रिय सभागृहमा सो कार्यक्रम आयोजना गरेको हो ।

पाँचजना वक्ता रहनुभएको सो संवाद कार्यक्रममा राजनीतिक विश्लेषक तथा स्तम्भकार श्रीकृष्ण अनिरुद्ध गौतमले स्वागत भाषण गरेका थिए । निकेशकुमार लम्सालले सञ्चालन गरेको सो कार्यक्रममा सर्वोच्च अदालतका पूर्व न्यायाधीश आनन्दमोहन भट्टराई, चन्द्रदेव भट्ट, भारतका राजनीतिक शास्त्रका प्राध्यापक डा. सञ्जीवकुमार शर्माले लोकतन्त्र, राष्ट्रियता, सुशासन र आगामी फागुन २१ गते हुने निर्वाचनलगायत समसामयिक विषयमा आ/आफ्नो धारणा राखेका थिए ।

सो अवसरमा गौतमले देशमा संविधान र व्यवस्थामात्र परिवर्तन भएको छ यो रोकिनुपर्छ र यसका लागि आगामी सबैको विवेकको परीक्षा हुने बताए । यस्तै कार्यक्रमका अर्का वक्ता सञ्जीव शर्माले अत्रिस्मृतिको अंश उद्धरण गर्दै शासकमा सुशासन गर्ने प्रतिबद्धता हुनुपर्ने भने ।

सो कार्यक्रमका पछिल्ला वक्ता आनन्दमोहन भट्टराईले अदालतले क्रान्ति गर्दैन तर क्रान्ति भइहाल्यो भने त्यसलाई आत्मसात् गर्छ भने । यस्तै विगतमा १७ पटकसम्म निर्वाचन हुँदा पनि संसद्ले प्रधानमन्त्री छान्न नसकेको र सर्वोच्च अदालतले यस्तो निर्वाचनमा सांसद तटस्थ बस्न नपाउने भनी फैसला गरिदिएपछि मात्र मुलुकले प्रधानमन्त्री पाएको उल्लेख गर्दै अदालतको भवन जलाइए पनि अन्तिम अवस्थामा अदालतकै नेतृत्वले देश सम्हालेको पनि भट्टराईले बताए।