भारतविरुद्ध खेल्न पाकिस्तान सहमत

काठमाडौं, माघ २७ । आईसीसी टी–२० विश्वकपमा भारतसँग नखेल्ने निर्णयबाट पछि हट्दै पाकिस्तान खेल्न सहमत भएको छ। अब भारत–पाकिस्तानबीचको खेल फेब्रुअरी १५ मा श्रीलंकाको कोलम्बोमा तय समयमै हुनेछ।

पाकिस्तान सरकारले मित्र राष्ट्रहरूको आग्रह र छलफलपछि क्रिकेटको भावना जोगाउन यो निर्णय लिएको जनाएको छ। आईसीसी र पाकिस्तान क्रिकेट बोर्डबीचको वार्ता सफल भएपछि सबै सदस्य राष्ट्रहरूले प्रतियोगिताप्रति प्रतिबद्धता जनाएका छन्।

यसअघि बंगलादेशलाई लिएर उठेको विवाद पनि समाधान भएको छ र उसमाथि कुनै कारबाही नहुने निर्णय गरिएको छ। अब क्रिकेटप्रेमीहरूले विश्वकपको सबैभन्दा प्रतिक्षित भारत–पाकिस्तान भिडन्त हेर्न पाउने भएका छन्।