म सदनमा रहूँ वा नरहूँ तर देशले हार्नु हुँदैन : ज्ञानेन्द्र मल्ल

काठमाडौँ, २ चैत । राष्ट्रिय स्वतन्त्र पार्टी (रास्वपा) को समानुपातिक बन्दसूचीमा समेटिएका नेपाली क्रिकेट टीमका पूर्वकप्तान ज्ञानेन्द्र मल्ल सांसदको सिफारिसमा भने पर्न सकेनन् । मल्लले आफू सांसद बने पनि नबने पनि देशले हार्नु नहुने बताएका छन्।

रास्वपाले आइतबार निर्वाचन आयोगमा बुझाएको ५७ जनाको समानुपातिक सूचीमा मल्लको नाम समेटिएको छैन। रास्वपाले मल्ललाई आदिवासी जनजातिको क्लस्टरमा पाँचौ नम्बरमा राखिएको थियो ।

रास्वपाले आइतबार निर्वाचन आयोगमा बुझाएको समानुपातिक सांसदको सूचीमा मल्लको नाम नसमेटिएपछि खेलकुद क्षेत्रका कतिपयले ज्ञानेन्द्रमाथि धोका भएको टिप्पणी गरिरहेका छन्।

मल्लले सोमबार सामाजिक सञ्जालमार्फत आफ्नो धारणा सार्वजनिक गर्दै यस्तो भनेका छन्, “क्रिकेटबाट मैले सिकेको कुरा “मैदानभित्रको टिम ११ मा म रहूँ वा नरहूँ, तर मेरो देशले हार्नु हुँदैन।”

खेल व्यक्तिगत रेकर्डका लागि होइन, टिमको जितका लागि खेलिन्छ। त्यसैले, देशलाई जिताउन मैदानमा उत्रिएका साथीहरूले व्यक्तिगत स्वार्थभन्दा माथि उठेर जनताको हित, राष्ट्रको विकास, सुशासन र भ्रष्टाचार अन्त्यका लागि एक ढिक्का भएर खेल्नुहुनेछ भन्ने विश्वासका साथ सफल कार्यकालको हार्दिक शुभकामना व्यक्त गर्दछु।

यस निर्वाचनमा आफ्नो अमूल्य मतमार्फत देशको समृद्धिका लागि मत लगानी गर्नुहुने सम्पूर्ण आदरणीय मतदाताहरूमा हृदयदेखि नै धन्यवाद। मलाई यो अवसरमा सम्झनुहुने रास्वपा परिवार, आदरणीय कुमार दाइ र बालेन जी प्रति विशेष कृतज्ञता व्यक्त गर्दछु।

म सदनमा रहूँ वा सडकमा, सधैँ देशको सेवाका लागि जुनसुकै भूमिकाबाट अघि बढिरहनेछु। किनकि अन्त्यमा, व्यक्तिको हार-जित भन्दा पनि देशको जित नै सबैभन्दा ठूलो कुरा हो।”