युद्धले इरानमा लाखौँ बेरोजगार

तेहरान । अमेरिका–इजरायल र इरानबीचको द्वन्द्वका कारण इरानमा लाखौँ मानिसले रोजगारी गुमाएका छन् । राजधानी तेहरान लगायत देशभर विभिन्न क्षेत्रमा यसको असर परेको समाचारमा उल्लेख छ ।

तेल रिफाइनरीका कामदार, कपडा उद्योगका कर्मचारी, ट्रक चालक, विमान परिचारिका र पत्रकारसमेत बेरोजगार हुनेहरूको सूचीमा परेका छन् । युद्ध सुरु हुनु अघि नै इरानको अर्थतन्त्र कमजोर अवस्थामा थियो । सन २०१२ मा प्रतिव्यक्ति आय करिब ८ हजार डलरबाट घटेर २०२४ मा ५ हजार डलरमा झरेको थियो । जसको कारण उच्च मुद्रास्फीति, भ्रष्टाचार र प्रतिबन्धहरू थिए ।

अब अवस्था झन् बिग्रिने अनुमान गरिएको छ । यूएनडीपीका अनुसार यस द्वन्द्वका कारण थप ४१ लाख मानिस गरिबीमा धकेलिन सक्छन् ।

हजारौँ हवाई आक्रमणका कारण ठुलो भौतिक क्षति भएको छ । इरानी मिडिया रिपोर्टअनुसार २३ हजारभन्दा बढी कारखाना र व्यवसाय प्रभावित भएका छन् । इरानका उपश्रम तथा सामाजिक सुरक्षा मन्त्री गुलामहोसेन मोहम्मदीका अनुसार यसले प्रत्यक्ष रूपमा करिब १० लाख रोजगारी गुमाएको छ

। साथै अप्रत्यक्ष प्रभावले थप १० लाख मानिस बेरोजगार बनेको अनुमान गरिएको छ । समुद्री यातायात र आयातमा आएको अवरोधले पनि अर्थतन्त्रमा गम्भीर असर पारेको छ ।

क्विन्सी इन्ष्टिच्यूटका विशेषज्ञ हादी कहालजादेहका अनुसार इरानका ५० प्रतिशत रोजगारी जोखिममा छन् भने थप ५ प्रतिशत जनसङ्ख्या गरिबीमा धकेलिन सक्छ ।

सरकारी तथ्यांकले बेरोजगारी भत्ताका लागि आवेदन दिनेहरूको संख्या तीव्र रूपमा बढेको देखाउँछ । पछिल्ला दुई महिनामा १ लाख ४७ हजार आवेदन परेका छन्, जुन गत वर्षको तुलनामा करिब तीन गुणा बढी हो ।