आबुधाबी । संयुक्त अरब इमिरेट्स (यूएई)ले तेल उत्पादक देशहरूको सङ्गठन ओपेक र यस बाहिरका ठुला उत्पादकहरूको समूह ओपेक प्लसबाट बाहिरिने निर्णय गरेको छ । इरानसँग सम्बन्धित युद्धका कारण विश्व ऊर्जा बजारमा तनाव बढिरहेका बेला आएको यो कदमले तेल कार्टेललाई ठुलो धक्का दिने आकलन गरिएको छ ।
सरकारी सञ्चार माध्यममार्फत सार्वजनिक गरिएको विज्ञप्तिमा यूएईले राष्ट्रिय हितमा केन्द्रित हुनका लागि यो निर्णय लिएको जनाएको छ । निर्णय शुक्रबारदेखि लागू हुने बताइएको छ । ओपेकमा रहँदा आफूले महत्त्वपूर्ण योगदान र त्याग गरेको तर अब आफ्नो दीर्घकालीन रणनीति र आर्थिक दृष्टिकोण अनुसार अघि बढ्ने समय आएको यूएईले विज्ञप्तिमा उल्लेख गरेको छ ।
यूएईको बहिर्गमनले ओपेकभित्रको एकता कमजोर हुनसक्ने र तेल उत्पादन नीतिमा अस्थिरता ल्याउनसक्ने विश्लेषण गरिएको छ । विशेष गरी, उत्पादन कोटा र भू(राजनीतिक मुद्दाहरूमा पहिले नै मतभेद रहँदै आएका थिए । यूएईका ऊर्जामन्त्री सुहेल मोहम्मद अल(मज्रोइले यो निर्णय सावधानीपूर्वक वर्तमान र भविष्यका ऊर्जा नीतिहरूको मूल्याङ्कनपछि गरिएको बताए । उनले यो विषयमा साउदी अरेबिया जस्ता अन्य देशहरूसँग कुनै परामर्श नगरिएको पनि स्पष्ट पारे ।
यसैबिच, स्ट्रेट अफ होर्मुज हुँदै हुने तेल आपूर्ति पनि प्रभावित भएको छ । यो क्षेत्र विश्वको २० प्रतिशत तेल तथा ग्यास आपूर्तिको मुख्य मार्ग हो, जहाँ हाल युद्धका कारण जहाजहरूलाई खतरा बढेको छ । अर्काेतर्फ, अमेरिकी राष्ट्रपति डोनाल्ड ट्रम्पले ओपेकमाथि विश्व बजारमा तेलको मूल्य कृत्रिम रूपमा बढाएर अन्य देशहरूलाई शोषण गरेको आरोप लगाउँदै आएका छन् । अमेरिकाले सुरक्षा प्रदान गरिरहँदा ओपेक सदस्यहरूले उच्च मूल्य लादेको टिप्पणी समेत उनले गरेका छन् ।
प्रतिक्रिया