इलाम । प्रमुख प्रतिपक्षी दल नेपाली कांग्रेस संसदीय दलका नेता भीष्मराज आङ्देम्बेले प्रतिपक्षको भूमिकालाई सिर्जनात्मक र उत्तरदायी बनाउनेतर्फ जोड दिएका छन् ।
इलाम नगरपालिकाको नगरसभामा नेता आङ्देम्बेले संसद्भित्र प्रतिपक्षले उठाउने आवाज कुनै दलविशेषको नभएर आम नागरिकको ऐना भएको दाबी गरे ।
उनको यो अभिव्यक्तिले समकालीन नेपाली राजनीतिमा प्रतिपक्षको बदलिँदो शैली र नागरिकको संसद्प्रतिको अपेक्षालाई उजागर गरेको छ ।
नेता आङ्देम्बेको सम्बोधनको मुख्य केन्द्रविन्दु मुलुकको मेरुदण्ड मानिएको कृषि क्षेत्र र त्यससँग जोडिएका नागरिकका सास्तीहरू थिए । वर्तमान सरकार ठूलो जनमतसहित सत्तामा आसीन भए पनि यसले अर्थतन्त्रको जग मानिने किसानका समस्यालाई बेवास्ता गरेको उनको आरोप छ ।
आङ्देम्बेले भने, ‘देशमा जसरी किसानहरू प्रताडित भइरहेका छन्, यसले हाम्रो अर्थतन्त्रलाई गम्भीर मोडमा पुर्याइरहेको छ । त्यसप्रति अहिले पनि राष्ट्र संवेदनशील भइरहेको छैन ।’
विश्लेषकहरूका अनुसार आङ्देम्बेको यो भनाइले एकातिर किसानका समस्यामाथि राज्यको लाचारीपनलाई देखाउँछ भने अर्कोतिर सरकारको कमजोर आर्थिक प्राथमिकतामाथि सीधा प्रहार गर्छ ।
आङ्देम्बेको विश्लेषणको सबैभन्दा रोचक र रणनीतिक पाटो थियो- नयाँ राजनीतिक शक्ति र आम मतदाताको मनोविज्ञान । गत निर्वाचनमा परम्परागत दलहरू सुध्रिन नसकेको भन्दै नागरिकहरूले नयाँ दल र वैकल्पिक शक्तिलाई उत्साहका साथ मत दिएका थिए । तर, रास्वपा पनि राजनीतिक विकृतिमा फसेपछि नागरिकमा पुनः निराशा छाउन थालेको आङ्देम्बेको जिकिर छ ।
प्रमुख दलहरूले नागरिकको विश्वास र मतको समयमै सम्मान गर्न नसक्दा नै जनताको आक्रोश र निराशा नयाँ दलतर्फ मोडिएको यथार्थलाई उनले खुला हृदयले स्वीकार गरे ।
संसद्मा प्रतिपक्षको काम सरकारलाई जनताप्रति उत्तरदायी बनाउन निरन्तर सचेत गराउनु हो भन्ने मान्यतामा कांग्रेसले जोड दिएको आङ्देम्बेको भनाइ छ । आङ्देम्बेले संसद्भित्र प्रतिपक्षीको आवाज भनेकै आम जनताको आवाज भएको भन्दै सरकारलाई आफ्ना वाचाहरू पूरा गर्न खरो रूपमा उत्रिन निरन्तर खबरदारी गरिरहने स्पष्ट पारे ।
नेता आङ्देम्बेको इलामको सम्बोधन एउटा औपचारिक मन्तव्य मात्र होइन, यो नेपाली कांग्रेसले आगामी दिनमा संसद्मा अवलम्बन गर्ने राजनीतिक मार्गचित्रको सङ्केत पनि हो । सरकारलाई जनअपेक्षाअनुसार काम गर्न बाध्य पार्ने र नयाँ शक्तिहरूको कमजोरीलाई औंल्याउँदै जनताको गुमेको विश्वास पुनः आर्जन गर्ने दोहोरो रणनीतिमा यतिबेला प्रमुख प्रतिपक्ष देखिन्छ । आङ्देम्बेले पछिल्लोपटक संसद्मा निकै चोटिलो अभिव्यक्ति दिएका थिए । उनले सदनमा सम्बोधनका क्रममा प्रधानमन्त्रीको सीमासम्बन्धी अभिव्यक्ति आपत्तिजनक रहेको बताउँदै सच्याउनुपर्नेमा जोड दिएका थिए ।
प्रतिक्रिया