कांग्रेसको १५औँ महाधिवेशनलाई पेपरलेस बनाउने कसरत

काठमाडौँ । आन्तरिक लोकतन्त्र र गुटगत राजनीतिको रोचक केन्द्र बन्दै आएको देशकै सबैभन्दा पुरानो दल नेपाली कांग्रेसले आफ्नो आगामी १५औँ केन्द्रीय महाधिवेशनलाई प्रविधिमैत्री र ऐतिहासिक बनाउने संकेत गरेको छ। पुरानो ढर्रा र खर्चिलो कागजी मतपत्रको युगलाई विश्राम दिँदै कांग्रेसले यसपटक निर्वाचन प्रक्रियामा डिजिटल प्रणाली तथा ईभीएम (इलेक्ट्रोनिक भोटिङ मेसिन) प्रविधिलाई प्राथमिकताका साथ अघि बढाउने महत्त्वपूर्ण निर्णय गरेको छ।
ललितपुरको सानेपास्थित केन्द्रीय कार्यालयमा बसेको कांग्रेस केन्द्रीय निर्वाचन समितिको बैठकले महाधिवेशनलाई पेपरलेस र पारदर्शी बनाउने ऐतिहासिक निर्णय गरेको हो।
मतपरिणाम आउन समय लाग्ने र अनेकौँ विवाद सिर्जना हुने पुरानो निर्वाचन प्रणालीलाई विस्थापन गर्न कांग्रेसले यसपटक प्रविधिको सहारा लिने भएको हो। निर्वाचन प्रक्रियालाई पूर्ण रूपमा डिजिटलाइजेशन गर्दै सकेसम्म पेपरलेस प्रणाली अपनाउने र मतदानका लागि ईभीएम प्रविधिको प्रयोगलाई उच्च प्राथमिकता दिने निर्णय समितिले गरेको छ। यसले निर्वाचनको खर्च घटाउने मात्र नभई परिणाम पनि तत्कालै आउने अपेक्षा गरिएको छ।
नेपाली कांग्रेसभित्र महाधिवेशनका बेला प्राविधिक त्रुटि, धाँधलीका आशंका र मतगणनाको ढिलासुस्तीलाई लिएर सधैँ रडाको मच्चिने गरेको इतिहास छ। यो पृष्ठभूमिमा निर्वाचन समितिले अघि सारेको डिजिटल र ईभीएमको अवधारणा आफैँमा स्वागतयोग्य छ। तर, पार्टीभित्रै रहेका प्रविधि–अविश्वासी पुराना पुस्ताका नेताहरूलाई चित्त बुझाउनु र ईभीएमको विश्वसनीयतामाथि उठ्न सक्ने राजनीतिक प्रश्नहरूको सामना गर्नु नेतृत्वका लागि उत्तिकै चुनौतीपूर्ण हुनेछ।