भन्सार विभागको महानिर्देशकमा भुसाल नियुक्त

काठमाडौं । अर्थ मन्त्रालयअन्तर्गत दुई महत्त्वपूर्ण विभागमा नयाँ नेतृत्व नियुक्त गरिएको छ ।

अर्थ मन्त्रालयले भन्सार विभागको महानिर्देशकमा सहसचिव यमलाल भुसाललाई नियुक्त गरेको छ । विभागका निमित्त महानिर्देशक भरतमणि पाण्डेयलाई भने अर्थ मन्त्रालयबाहिर सरुवा गरिएको छ। त्यस्तै, भन्सार विभागको उपमहानिर्देशकमा सहसचिव प्रेमप्रसाद आचार्यलाई नियुक्त गरिएको मन्त्रालयले जनाएको छ ।

यस्तै, आन्तरिक राजस्व विभागको महानिर्देशकमा सहसचिव डा.भीष्मकुमार भुसाललाई नियुक्त गरिएको छ । हालका महानिर्देशक रमेश अर्याललाई अर्थ मन्त्रालयबाहिर सरुवा गरिएको मन्त्रालयले जनाएको छ।